ՌԴ նախագահ Վլադիմիր Պուտինն ու Հյուսիսային Կորեայի ղեկավար Կիմ Չեն Ընը Փհենյանում ավարտել են դեմ առ դեմ բանակցությունները։ Անձնական հանդիպումը տևել է մոտ երկու ժամ։ Բանակցությունների արդյունքում պետությունների ղեկավարները համաձայնագիր են ստորագրել համապարփակ ռազմավարական գործընկերության մասին։ Այս մասին հայտնում են ռուսական լրատվամիջոցները:
Փաստաթղթի բովանդակության մասին մանրամասներ դեռևս հայտնի չեն։ Ռուսաստանի Դաշնության նախագահն ասել է, որ համաձայնագիրը կձևավորի երկու երկրների հարաբերությունները «երկարաժամկետ հեռանկարում»: Ակնկալվում է, որ այն կփոխարինի այլ փաստաթղթերի՝ 1961 թվականի Բարեկամության և փոխօգնության պայմանագրին, 2000 թվականի Բարեկամության, բարիդրացիության և համագործակցության պայմանագրին, ինչպես նաև 2000 և 2001 թվականների Մոսկվայի և Փհենյանի հռչակագրերին:
ՌԴ նախագահը երկօրյա այցով ԿԺԴՀ է ժամանել նախօրեին։ Այսօր՝ հունիսի 19-ի առավոտյան, երկու երկրի ղեկավարները պատվիրակությունների մասնակցությամբ բանակցություններ են վարել, որոնք տևել են ավելի քան մեկուկես ժամ։
