Հայաստանի 32+1 գյուղերի կենսական օկուպացված տարածքների հարցը երբեք օրակարգից չենք հանել ու չենք հանելու․ այս մասին ԱԺ-ում լրագրողների հետ զրույցում ասաց ՀՀ վարչապետ Նիկոլ Փաշինյանը՝ պատասխանելով հարցին՝ բանակցային սեղանին կոնկրետ հարց դրվա՞ծ է, որ, օրինակ, մինչև խաղաղության պայմանագրի կքնումը, ադրբեջանցիները պետք է դուրս գան Հայաստանի օկուպացված տարածքներից՝ Ջերմուկ, Վարդենիս։
«Սեղանին դրված է հետևյալը՝ հիմա սահմանազատման հանձնաժողովները համաձայնեցնում են իրենց համատեղ աշխատանքի կանոնակարգը, որը պետք է ստորագրվի, ապա անցնի ներպետական ընթացակարգերով և այդ կանոնակարգի հիման վրա պետք է շարունակվի սահմանազատումը։
Որտե՞ղ պետք է շարունակվի սահմանազատումը, պետք է ձևավորվի կոնսենսուս՝ համատեղ որոշմամբ»,- ասաց Փաշինյանը։
Նա հավելեց, որ կարևոր սկզբունք են ստեղծում․ «Մենք նոր սահման չենք ստեղծում, սահմանն անցնում է այնտեղով, որտեղով անցնում, է և սա շատ կարևոր սկզբունք է։ Որոշ տեղերում դա մեզ համար ցավոտ է, բայց դա ճիշտ սկզբունք է՝ ապահովելու համար Հայաստանի ինքնիշխանությունն ու անվտանգությունը»,- ասաց նա։
Վարչապետը վստահեցրեց, թե Հայաստանի ինքնիշխան տարածքից ոչ մի միլիմետր չի զիջվել ու չի զիջվելու: «Հայաստանի ինքնիշխան տարածքի ոչ մի միլիմետր սակարկման ենթակա չէ»,- ասաց նա՝ ընդգծելով, թե ինչքան Ադրբեջանի, այդքան էլ Հայաստանի նախաձեռնությունն է եղել սահմանազատումը սկսել Տավուշից։
«Կարծում եմ՝ այդ թվում Ոսկեպարի անվտանգության ապահովման ամենաարդունավետ միջոցը սահմանազատված սահմանն է, այդ թվում՝ Կիրանցի, մյուս գյուղերի։ Մենք հետաքրքրված ենք, որ այդ պրոցեսը շարունակվի նույն տրամաբանությամբ»,- նշեց վարչապետը։