ՀՀԿ-ն, որպես ազգային կուսակցություն, միշտ կանգնած է մեր եկեղեցու, բանակի և պետության կողքին և նման մեղադրանք առաջադրելը ծիծաղելի է: Այս մասին խորհրդարանական ճեպազրույցների ժամանակ հայտարարեց «Պատիվ ունեմ» խմբակցության ղեկավար Հայկ Մամիջանյանը՝ անդրադառնալով ԱԺ փոխխոսնակ Ռուբեն Ռուբինյանի հայտարարությանը, թե ՀՀ երկրորդ և երրորդ նախագահները եկեղեցին օգտագործում են քաղաքական դիվիդենտներ շահելու համար: «Ես կվերադարձնեմ իրեն պատասխանը։ Ռուբինյանն իր գրառումներում անընդհատ հայտարարում է, թե ինքը առաքելական եկեղեցու հոտի անդամ է, այդ դեպքում ինքն ինչպես է վերաբերվում նրան, որ իր հարազատ կուսակցությունը բազմիցս՝ թե՛ փողոցային, թե՛ ընտրական գործընթացների ժամանակ օգտագործել է ՀՀ-ում գործող կրոնական աղանդների հնարավորությունները՝ քաղաքական նպատակների հասնելու համար»,- ասաց նա: