Արցախի Մարտակերտի շրջանի Հաթերք գյուղի ղեկավար Վարդան Գրիգորյանն ազատ է արձակվել։ Այս մասին հայտնում են ՄԻՊ գրասենյակից:
«Հաշվի առնելով հանրային լայն արձագանքը, նաև ՄԻՊ աշխատակազմում ստացվող հարցումները՝ տեղեկացնենք, որ Մարդու իրավունքների պաշտպանի աշխատակազմում ահազանգ է ստացվել առ այն, որ ձերբակալել են Հաթերքի գյուղապետ Վարդան Գրիգորյանին՝ մեքենայում միայնակ թողնելով վերջինիս մանկահասակ երեխաներին։
Պաշտպան Անահիտ Մանասյանի հանձնարարությամբ՝ դեպքի մանրամասները հրատապության կարգով բանավոր ընթացակարգով ճշտվել են պետական իրավասու մարմինների հետ: Արդյունքում, պարզվել է, որ Վարդան Գրիգորյանն ազատ է արձակվել: Դեպքի հանգամանքների մանրամասները պարզելու նպատակով գրավոր պարզաբանում կպահանջվի նաև ՀՀ ազգային անվտանգության ծառայությունից»,- նշվում է հաղորդագրության մեջ:
Ավելի վաղ իրավապաշտպան Ռուբեն Մելիքյանը հայտնել էր Հաթերքի գյուղապետի ձերբակալման մասին՝ նշելով, որ 3 անչափահաս երեխաների ներկայությամբ քաշքելով՝ գյուղապետին մեքենայից հանել են և ձերբակալել։
