ՀԱՊԿ արտգործնախարարների խորհրդի հաջորդ նիստը տեղի կունենա Աստանայում, այս տարվա նոյեմբերին։ Տեղեկությունը հայտնել է Ղազախստանի փոխվարչապետ և արտգործնախարար Մուրատ Նուրտլեուն:
«Մեր հաջորդ հանդիպումն առաջարկվում է անցկացնել Աստանայում այս տարվա նոյեմբերին՝ ՀԱՊԿ Հավաքական անվտանգության խորհրդի նստաշրջանի նախօրեին (տեղի կունենա նոյեմբերի 28 — ին)», — ասել է նա Ալմաթիում ՀԱՊԿ արտգործնախարարների ընդլայնված նիստի ժամանակ, որին հայկական կողմը չի մասնակցում:
Ինչպես հայտարարել է ՀԱՊԿ գլխավոր քարտուղար Իմանգալի Տասմագամբետովը, Ալմաթիում կայացած հանդիպման օրակարգում ընդգրկվել և հավանության են արժանացել ինը փաստաթղթերի նախագծեր, մասնավորապես՝ տաջիկա-աֆղանական սահմանի ամրապնդման, կազմակերպության 2024 թվականի բյուջեում փոփոխությունների, խաղաղ նպատակներով տիեզերական տարածության հետազոտման և օգտագործման, Մերձավոր Արևելքում և Հյուսիսային Աֆրիկայում իրադրության, խաղաղապահ զորավարժությունների անցկացման վերաբերյալ:
Ինչպես ավելի վաղ հայտնել էր ՌԴ ԱԳՆ-ն, փաստաթղթերը պատրաստվել են նոյեմբերի վերջին կայանալիք գագաթնաժողովում ՀԱՊԿ անդամ պետությունների ղեկավարների հավանությանն արժանանալու համար:
Հիշեցնենք` ՀՀ վարչապետ Նիկոլ Փաշինյանի մարտի 12-ին չբացառեց, որ ՀՀ–ն կարող է դուրս գալ ՀԱՊԿ-ից, եթե ՀԱՊԿ–ը չպատասխանի Հայաստանի բարձրացրած հարցին` ո՞րն է ՀԱՊԿ–ի պատասխանատվության գոտին Հայաստանում։
Թեև ՀԱՊԿ-ն պատասխանեց, որ Հայաստանում իր պատասխանատվության գոտին է համարում երկրի ինքնիշխան տարածքը, սակայն նախորդ տարվա սեպտեմբերյան գործողություններին ցուցաբերեց բառացի անգործություն։ Մայիսի 8-ին ՀՀ ԱԳՆ-ն հայտարարեց, որ Հայաստանը չի մասնակցի ՀԱՊԿ–ի գործունեության ֆինանսավորմանը, իսկ հունիսի 14-ին արդեն ՀՀ վարչապետ Փաշինյանը ԱԺ-ում հայտարարեց, որ հաջորդ տրամաբանական քայլը լինելու է ՀԱՊԿ–ից դուրս գալը: Այսօրվա նիստին Հայաստանը չէր մասնակցում…
