Ռուսաստանի և ԿԺԴՀ-ի առաջնորդներ Պուտինը և Կիմ Չեն Ինը առավոտից ժամանել են Կիմ Իր Սենի հրապարակ, որտեղ սկսվել է դիմավորման հանդիսավոր արարողությունը՝ ի պատիվ Ռուսաստանի նախագահի ԿԺԴՀ այցի: Հիշեցնենք, որ Ռուսաստանի նախագահ Վլադիմիր Պուտինը երկօրյա պետական այցով մեկնել է Հյուսիսային Կորեա։ Օդանավակայանում ՌԴ նախագահին դիմավորել է Հյուսիսային Կորեայի առաջնորդ Կիմ Չեն Ինը:
Հավելենք, որ ՌԴ նախագահին ուղեկցում է ներկայացուցչական պատվիրակություն։ Բանակցություններին կմասնակցեն ՌԴ ԱԳ նախարար Սերգեյ Լավրովը, պաշտպանության նախարար Անդրեյ Բելոուսովը, առաջին փոխվարչապետ Դենիս Մանտուրովը, փոխվարչապետ Ալեքսանդր Նովակը, բնական պաշարների նախարարության ղեկավար Ալեքսանդր Կոզլովը, առողջապահության նախարար Միխայիլ Մուրաշկոն, տրանսպորտի նախարար Ռոման Ստարովոյտը։
Վերջին անգամ Պուտինը ԿԺԴՀ-ում եղել է 2000 թվականին, երբ Հյուսիսային Կորեայի նախագահն այն ժամանակ Կիմ Չեն Իրն Իր՝ ներկայիս առաջնորդի հայրը: ՌԻԱ Նովոստիի փոխանցմամբ՝ դիմավորելուց հետո Պուտինն ու Կիմ Չեն Ինը բանակցությունների համար պետական նստավայր են մեկնել՝ բաց ավտոմեքենայով։
Սկսելով բանակցությունները՝ Պուտինը նշել է, որ պատրաստվել է նոր հիմնարար փաստաթուղթ, որը երկար տարիներ հիմք կհանդիսանա Ռուսաստանի և ԿԺԴՀ-ի հարաբերությունների համար:
«Անցյալ տարի Ռուսաստան կատարած Ձեր այցի արդյունքում մենք զգալիորեն առաջ շարժվեցինք այսօրվա մեր միջպետական կապերի կառուցման գործում։ Այսօր պատրաստվել է նոր հիմնարար փաստաթուղթ, որը երկարաժամկետ հեռանկարում կընկնի մեր հարաբերությունների հիմքում», — ասել է ՌԴ նախագահը։
Ռուսաստանի ղեկավարը հիշեցրել է, որ անցած տարի երկրները նշել են դիվանագիտական հարաբերությունների հաստատման 75-ամյակը, իսկ ընթացիկ տարում ՝ առաջին միջպետական փաստաթղթի՝ տնտեսական և մշակութային համագործակցության մասին համաձայնագրի կնքման 75 — ամյակը:
«Ինչպես հայտնի է, այդ համաձայնագիրը ստորագրվել է ընկեր Կիմ Իր Սենի կողմից՝ Մոսկվա կատարած նրա առաջին այցի ընթացքում»,- հիշեցրել է Ռուսաստանի ղեկավարը:
Պուտինը հույս է հայտնել, որ Կիմ Չեն Ինի հետ իրենց հաջորդ հանդիպումը կկայանա Մոսկվայում:
ՌԴ նախագահը նաև կիսվել է Փհենյանից ստացած իր տպավորություններով՝ նշելով, որ քաղաքը ավելի գեղեցիկ է դարձել:
«Տպավորիչ են Փհենյանի կերպարի փոփոխությունները, որոնք տեղի են ունեցել 2000 թվականին իմ նախորդ այցից ի վեր։ Դա պարզապես նկատելի է… Հաճելի է դիտել այն, անկեղծ եմ ասում», — հավելել է նա։