Տավուշը հանուն հայրենիքի շարժումն իր ֆեյսբուքյան էջում հայտարարություն է տարածել, որտեղ անդրադարձ է կատարվել Հանրային Հեռուստաընկերության լրագրող Իրինա Մկրտչյանի հաղորդմանը:
«Ծանոթացեք, Իրինա Մկրտչյանն է՝ Հանրային հեռուստաընկերության եթերով ժողովրդին սուտ ու կեղծիք «կերակրողը»։ Կատարելով մարդու որդու պատվերը՝ երկու օր առաջ խայտառակ տեսանյութ է պատրաստել Սրբազան պայքարի և նրա առաջնորդ Բագրատ Սրբազանի մասին։ Նյութի վերնագիրն արդեն իսկ խոսում է այս գրչակի բարոյական նկարագրի մասին։ Այստեղ խոսելու բան էլ չկա։ Պարզապես ցանկանում ենք, որպեսզի մարդիկ շատ լավ իմանան, թե ով՝ ով է մեր երկրում։ Ոչ ոքի չենք խնայելու։ Բոլորի մասին ասելու ենք ճշմարտությունը, միայն ճշմարտությունը և ոչինչ բացի ճշմարտությունից:
Այս հայտարարությանն էլ իր հերթին արձագանքել է ԱԺ փոխխոսնակ Ռուբեն Ռուբինյանը, որով դատապարտել է Տավուշը հանուն հայրենիքի շարժման կողմից տարածված հայտարարությունը:
«Դատապարտում եմ լրագրող Իրինա Մկրտչյանի թիրախավորումը Ն.Ս.Օ.Տ.Տ. Գարեգին Բ-ի օրհնությամբ և Բագրատ արքեպիսկոպոս Գալստանյանի համառաջնորդությամբ գործող ընդդիմադիր շարժման կողմից (պաշտոնական թելեգրամյան ալիքում հրապարակված): Այդ մասին Ֆեյսբուքի իր էջում գրել է ԱԺ փոխխոսնակ Ռուբեն Ռուբինյանը:
«Քաղաքական գործիչների՝ նույնիսկ սրբազան քաղաքական գործիչների կողմից լրագրողներին սպառնալն անընդունելի է ցանկացած դեպքում ու սցենարում՝ անկախ նրանից, թե ով է լրագրողը, կամ ով է սպառնացողը, կամ որն է խնդրո առարկան»,- գրել է նա:
Նկատենք, որ սույն պարոնը, կարծես թե մոռացել է, թե հունիսի 12-ին քանի լրագրող ինչ լուրջ վնասվածքներ են ստացել, կամ քանի անգամ են իշխանական պատգամավորները վիրավորել կամ թիրախավորել լրագրողներին:
