Ծառի տակ, գերեզմանատան ճանապարհին․ ոստիկանությունը հայտնաբերել է թաքցված զենք-զինամթերք

Զենք-զինամթերքի ապօրինի շրջանառության դեմ պայքարի շրջանակում ՆԳՆ ոստիկանության տարբեր ստորաբաժանումների ծառայողների իրականացրած բացատրական աշխատանքի արդյունքում բնակիչների կողմից շարունակվում են ապօրինի պահվող զենք-զինամթերքի կամավոր հանձնումները։

Զենք-զինամթերքը կամավոր հանձնելու հերթական դեպքն է գրանցվել Քրեական ոստիկանության Տավուշի մարզային վարչության ծառայողների բացատրական աշխատանքի արդյունքում։

ՆԳՆ 112 օպերատիվ կառավարման կենտրոն զանգած քաղաքացին հայտնել էր, որ Իջևան համայնքի «Աղսու» կոչվող տարածքում՝ ծառի տակ, զենք-զինամթերք է թողել։

Նշված վայրում քրեական ոստիկանները հայտնաբերել են «ԱԿ-74» տեսակի ինքնաձիգ, 16 մմ տրամաչափի երկփողանի որսորդական հրացան, ատրճանակ, տարբեր տեսակի 12 նռնակ, նռնակի 3 պայթուցիչ, տարբեր տրամաչափի 1100 փամփուշտ և փամփուշտի լիցքավորված շղթա։

Ապօրինի պահվող զենք-զինամթերք է կամավոր հանձնվել նաև Համայնքային ոստիկանության Կումայրիի բաժնի ծառայողների բացատրական աշխատանքի շնորհիվ։

Ոստիկանություն զանգած քաղաքացին հայտնել էր, որ զենք-զինամթերք է թողել Գյումրիի հին գերեզմանատուն տանող ճանապարհին գտնվող շինության մոտ։

Համայնքային ոստիկանները քաղաքացու նշած վայրում հայտնաբերել են «ԱԿ-74» տեսակի ինքնաձիգ, 16 մմ տրամաչափի երկփողանի ողորկափող որսորդական հրացան, 2 ատրճանակ, 2 նռնակ՝ պայթուցիչներով, տարբեր տրամաչափի 79 փամփուշտ և այլ զինամթերք։

Համայնքային ոստիկանության Հրազդանի բաժնի ծառայողների բացատրական աշխատանքի արդյունքում էլ ոստիկանություն զանգած քաղաքացին ապօրինի պահվող զենք-զինամթերք էր թողել Հրազդանի Վանատուր թաղամասի գերեզմանատուն տանող ճանապարհին։ Համայնքային ոստիկանները նշված վայրում հայտնաբերել են «ԱԿ-74» տեսակի ինքնաձիգ՝ փամփշտատուփով, նռնակ, նռնակի պայթուցիչ և տարբեր տրամաչափի 80 փամփուշտ։

Հիշեցնենք, որ Քրեական օրենսգրքի 335-րդ հոդվածի 4-րդ մասի համաձայն՝ հրազենը, դրա հիմնական բաղկացուցիչ մասերը, ռազմամթերքը և այլ նյութերը, սարքերը, առարկաները կամավոր հանձնած անձն ազատվում է քրեական պատասխանատվությունից։