«Կիսաբաց լուսամուտներ» հաղորդաշարից հայտնի ԱԺ «ՔՊ» խմբակցության պատգամավոր Հասմիկ Հակոբյանի եկամուտներն աճել են։ «Փաստինֆո»-ն ուսումնասիրել է վերջինիս 2025 թվականի գույքի, եկամուտների, ծախսերի և շահերի հայտարարագիրը։
Հակոբյանին միանձնյա սեփականության իրավունքով պատկանում է բազմաբնակարան շենքում գտնվող բնակարան, որը նա ձեռք է բերել հեղափոխությունից հետո՝ 2019 թվականին։ Վերջինս հայտարարագրել է նաև 2015 թվականի արտադրության HYUNDAI մակնիշի ավտոմեքենա, որը ձեռք է բերել 2021 թվականին։
Նա ունի նաև հանձնված և վերադարձված փոխառություններ, որոնց պարտապանը «Արմ Կոնստրակտ» ՍՊԸ-ն է։ Փոխառության գումարը կազմել է 33 միլիոն 100 հազար դրամ։ Ի դեպ, ընկերությունը ներառված է 1000 խոշոր հարկատուների ցանկում։
Բանկային հաշիվների մնացորդները տարվա ընթացքում աճել են։ 31 հազար 990 դրամը տարեվերջին դարձել է 1 միլիոն 389 հազար 233 դրամ, իսկ 6 միլիոն 380 հազար 655 դրամը՝ 8 միլիոն 974 հազար 764 դրամ։ Կանխիկ դրամը ևս աճել է՝ 850 հազար դրամից դառնալով 1 միլիոն դրամ։
Հաշվետու տարվա եկամուտը կազմել է 15 միլիոն 436 հազար 574 դրամ, որից 12 միլիոն 855 հազար 525 դրամը ԱԺ-ից ստացած վարձատրությունն է։
Ստացված վարկերի և փոխառությունների մայր գումարի մնացորդը 2025 թվականի դեկտեմբերի 31-ի դրությամբ կազմել է 39 միլիոն 304 հազար 203 դրամ, իսկ վարկերի մարմանն ուղղել է 5 միլիոն 625 հազար 447 դրամ։
