ՔՊ-ական պատգամավոր Սերգեյ Բագրատյանը նշանակվել է Երևանի շախմատի ֆեդերացիայի նախագահ։ Հատկանշական է, որ նրա կենսագրությունում շախմատին առնչվող որևէ գործունեության կամ փորձի մասին հիշատակում չկա։
Ընտրությունը կայացել է այսօր՝ հոկտեմբերի 31-ին, հրավիրված արտահերթ համաժողովի ընթացքում։ Ներկա 33 անդամները միաձայն կողմ են քվեարկել Բագրատյանի թեկնածությանը և ֆեդերացիայի նախագահության նոր կազմին։
Համաժողովի օրակարգում ընդգրկված է եղել հինգ հարց՝ նախագահության և վերստուգիչ հանձնաժողովի հաշվետվությունները, նախագահության ընտրությունները, կանոնադրական փոփոխություններն ու ընթացիկ հարցերը։
Ֆեդերացիայի նոր նախագահության կազմը հետևյալն է․
- Սերգեյ Բագրատյան՝ նախագահ,
- Նորայր Քալանթարյան՝ փոխնախագահ,
- Ռաֆայել Վահանյան՝ փոխնախագահ,
- Արսեն Մակվեցյան՝ նախագահության անդամ,
- Նորայր Հովհաննիսյան՝ նախագահության անդամ,
- Վարդան Մելքոնյան՝ նախագահության անդամ։
Հիշեցնենք, որ Հայաստանի շախմատի ֆեդերացիայի նախագահը ՀՀ երրորդ նախագահ Սերժ Սարգսյանն է։
