Գերմանիայի կանցլեր Ֆրիդրիխ Մերցը հայտարարել է, որ նոյեմբերի 19-ին Բեռլինում կկայանա «Կամավորների կոալիցիան» կազմող երկրների պետությունների և կառավարությունների ղեկավարների գագաթնաժողովը։
«Ես «Կամավորների կոալիցիայի» ներկայացուցիչներին հրավիրել եմ անձնական հանդիպման նոյեմբերի 19-ին Բեռլինում։ Բեռլին կժամանեն պետությունների և կառավարությունների մեծ թվով ղեկավարներ», — ասել է Մերցը Վլադիմիր Զելենսկու մասնակցությամբ մամուլի ասուլիսում։
Մերցի խոսքով՝ գագաթնաժողովի օրակարգում կներառվի 2027 թվականին Ուկրաինային տրամադրվող օգնության մակարդակի քննարկումը։ Գերմանիայի կանցլերը նշել է, որ հետագա ռազմական օգնությունը կլինի հիմնական ուշադրության կենտրոնում։
«Կամավորների կոալիցիան» ներառում է ավելի քան 30 երկիր։ Հունվարին խմբի ղեկավարները ստորագրել են խաղաղության համաձայնագրից հետո Ուկրաինա զորքեր տեղակայելու մտադրության մասին հռչակագիր։ Ռուսաստանի նախագահի մամուլի քարտուղար Դմիտրի Պեսկովը «Կամավորների կոալիցիային» անվանել է պատերազմ հրահրողներ՝ նշելով, որ դա այն երկրների խումբն է, որը չի ցանկանում խաղաղություն։
