«Բյուջեի միջոցները ըստ էության արդյունավետ չեն ծախսվում»,- այսօր կառավարության նիստում հայտարարեց վարչապետ Նիկոլ Փաշինյանը:Նա այսպես բացատրեց միջոցների մսխումը.
«Կառավարությունը օդից չի ընկել: Մենք մեր տների, մեր ծախսային կուլտուրայի կրողն ենք: Ինչպես է ծախսում կառավարությունը գումարները՝ դա հասկանալու համար պետք է գնալ, մտնել մեր հարսանիքները, կնունքները, ծնունդները, տեսնենք այդ միջոցառման կազմակերպման վրա ինչպես ենք ծախսում: Ոնց այնտեղ ենք ծախսում, այդպես էլ այստեղ ենք ծախսում»:
Հետո Փաշինյանը բացահայտեց, թե ռեստորաններում, օբյեկտներում ինչպես է հետեւել քաղաքացիների սեղաններին ու ինչ եզրակացության է եկել.
«Ճիշտ է, լավ չի հետեւել քաղաքացիներին, բայց երբ առիթ է լինում, օրինակ, ռեստորաններում եւ այլնում, համատարած մեր բոլոր քաղաքացիները՝ 95 եւ ավելի տոկոսը իրենց անհրաժեշտից ոնց էլ լինի մի 20-30% ավել պատվիրում են: Երբ որ նայում ես, ռեստորանի դահլիճում նստած ես, սրահում նստած ես, նայում ես, մարդիկ հաշիվ են փակում գնում, մեկ էլ աչքդ ընկնում ա, ոնց որ հենց նոր դրած սեղան լինի, հլը մի 3 էդքան մարդ կարան գան, նստեն, սնվեն նորմալ, թողեն գնան: Սա սոցիալ-հոգեբանական պրոբլեմ է: Սա էլի կրթության ոլորտի հարց է: Օրինակ ինչի՞ է մեր սեղաններին միշտ երբեմն անգամներով ավել սնունդ, քան պետք է ուտել՝ կշտանալու համար, ընդ որում բոլորս ենք այդպես անում: Ասում ենք՝ լավ, երկու կոպեկ խնայել են, կարո՞ղ ա էդքան էլ ցանկալի հյուր չենք»: