Ինչպես տեղեկացրել էինք, այսօր ԴԱՀԿ նախկին պետ Միհրան Պողոսյանի՝ «Հայոց Համազգային Միասնություն» կուսակցության անդամներից մեկին ու համակիրներին ԱԱԾ էին կանչել: Խոսքը Ժիրայր Կիրակոսյանի, Հրայր Խաչատրյանի և Անգել Սարգսյանի մասին է: Ինչպես պարզվեց, նրանց կանչել են ու ահաբեկել, հետո ազատ թողել:
ԱԱԾ-ում նրանց ժամից ավելի նստեցրել են դատարկ սենյակում, բուն զրույցը տեւել է 7-8 րոպե: Առավել ուշագրավ է, թե ինչ բովանդակության է եղել այդ զրույցը: Նախ, հարցադրումներ են արել՝ ցույցերին մասնակցո՞ւմ եք, թե՞ չէ, էլի կմասնակցե՞ք, ապօրինի ինչ-որ բան անո՞ւմ եք, թե՞ ոչ, դուք քար նետե՞լ եք ոստիկանների վրա, իսկ զրույցի ենթատեքստը եղել է այն, որ հեռու մնացեք քաղաքականությունից ու այդ կուսակցությունից:
Քիչ առաջ կուսակցությունը կատարվածի հետ կապված հայտարարություն է տարածել, որտեղ մասնավորապես նշել է.
«Հայաստանի գործող վարչախումբը հերթական անգամ փորձ է անում բռնաճնշումներ իրականացնելով ահաբեկել «Հայոց Համազգային Միասնություն» կուսակցության անդամներին և համակիրներին։ Ինչպես արդեն տեղեկացրել էինք, այսօր առանց որևէ հիմնավորման Ազգային անվտանգության ծառայություն են կանչվել Ժիրայր Կիրակոսյանը, Հրայր Խաչատրյանը և Անգել Սարգսյանը։ Հերթական անգամ զավեշտալի պատրվակով ահաբեկելու անհաջող փորձից հետո, ԱԱԾ աշխատակիցները ազատ են արձակել քաղաքական հետապնդումների ենթարկված քաղաքացիներին։ «Հայոց Համազգային Միասնույուն» կուսակցությունը խստորեն դատապարտում է իշխանությունների կողմից իրականացվող ռեպրեսիաները: Հորդորում ենք իրավապահ մարմիններին զերծ մնալ ապօրինի գործողություններից: Թե՛ Ոստիկանությունը և թե՛ Ազգային անվտանգության ծառայությունը իրավունք չունեն քաղաքականությամբ զբաղվելու և կատարելու քաղաքական պատվերներ: Նման գործողությունները խստորեն դատապարտելի են և ապագայում առաջացնելու են քրեաիրավական հետևանքներ: Կոչ ենք անում իրավապահ մարմիններին չկատարել գործող վարչախմբի ապօրինի հրահանգները։ Իր հերթին իշխանությունը անհապաղ պետք է դադարեցնի քաղաքական հետապնդումները «Հայոց Համազգային Միասնություն» կուսակցության անդամների և համակիրների նկատմամբ: Ահաբեկման և ապօրինի հետապնդման յուրաքանչյուր փորձ էլ ավելի վճռական է դարձնում մեզ մեր պայքարում։ Աթոռները պահելու նպատակով ՀՀ քաղաքացիների նկատմամբ բռնաճնշումներ գործադրող ձախողված վարչախմբի ամեն հերթական քայլ էլ ավելի է մոտեցնում պատասխանատվության պահը»:
