Հայաստանում, հատկապես՝ Երևանում, էականորեն շատացել են էլեկտրական շարժիչով անհատական շարժունակության տրանսպորտային միջոցները, որոնք օգտագործվում են ոչ միայն որպես զվարճանքի, այլև որպես տրանսպորտ, այն է՝ տեղաշարժման միջոց, սննդի առաքման միջոց, զբոսաշրջիկների տեղաշարժման միջոց: Ըստ այդմ՝ անհրաժեշտություն է առաջացել կանոնակարգել ոլորտը, սահմանել երթևեկության կանոններ, ինչպես նաև վարչական տույժեր: Այդ մասին Ազգային ժողովի՝ սեպտեմբերի 9-ի նիստին ասաց ՀՀ ՆԳ նախարարի տեղակալ Դավիթ Համբարյանը՝ առաջին ընթերցմամբ ներկայացնելով ««Ճանապարհային երթևեկության անվտանգության ապահովման մասին» օրենքում լրացումներ և փոփոխություն կատարելու մասին» և «Վարչական իրավախախտումների վերաբերյալ ՀՀ օրենսգրքում փոփոխություններ և լրացումներ կատարելու մասին» նախագծերի փաթեթը:
Առանձնացվել են մինչև 18 տարեկանների և 18-ից բարձր խմբեր, որոնց համար սահմանվել են տրանսպորտային միջոցները վարելու համապատասխան վայրեր: Մինչև 18 տարեկանների համար վայրերը սահմանվում են ՏԻՄ-ի, համայնքի ավագանու կողմից, վայրեր, որոնք անվտանգության տեսանկյունից ապահով են, իսկ 18-ից բարձր տարիքային խմբի համար սահմանվել են երթևեկելի մասերը՝ հեծանվային ուղիներ, ճանապարհների աջ եզրագծեր:
Սահմանվել են նաև իրավախախտումներ ինչպես անհատական շարժունակության տրանսպորտային միջոցները վարձույթով տրամադրող ընկերությունների, այնպես էլ անհատների համար:
Թեմայի քննարկման ժամանակ ՔՊ խմբակցության պատգամավոր Սիսակ Գաբրիելյանը հետաքրքրվեց՝ թույլատրվելո՞ւ է դրանք վարել մայթերին, Դավիթ Համբարյանը պարզաբանեց՝ թույլատրվում է և՛ հետիոտնային արահետներում, և՛ մայթերին, բայց պետք է լինի արագության սահմանափակում, հետիոտները կունենան առավելություն տրանսպորտային միջոցը վարողի նկատմամբ:
ՔՊ խմբակցության քարտուղար Արթուր Հովհաննիսյանը հետաքրքրվեց՝ մայրաքաղաքում առանց համարանիշների մոպեդներ կան, վարողները քշում են՝ հոծ գծերը, կարմիր գծերը խախտելով, ի՞նչ կա նախատեսված այս մասով: Դավիթ Համբարյանը տեղեկացրեց՝ առանց պետհամարանիշի մոպեդ վարելը տրանսպորտային միջոցի օգտագործման կանոնների խախտում է:
