Իրանի գերագույն առաջնորդ Այաթոլլահ Ալի Խամենեին ուրբաթօրյա քարոզի ժամանակ հայտարարել է, որ Իրանը և նրա տարածաշրջանային դաշնակիցները հանգիստ չեն տա Իսրայելին, գրում է Reuters-ը:
«Տարածաշրջանի դիմադրության ուժերը (պաղեստինյան ՀԱՄԱՍ, լիբանանյան «Հեզբոլլահ», Եմենի հութիներ, Իրաքի զինված դիմադրության ուժեր-Խմբ.) չեն նահանջելու նույնիսկ իրենց առաջնորդների սպանություններից հետո», — ասել է Իրանի գերագույն առաջնորդը:
Խամենեին ընդգծել է, որ Աֆղանստանը ևս պետք է միանա «պաշտպանությանը»:
Նշենք, որ Թեհրանում սպանվել էր ՀԱՄԱՍ-ի ղեկավար Իսմայիլ Հանիեն, իսկ Լիբանանում՝ «Հեզբոլլահ»-ի գլխավոր քարտուղար Հասան Նասրալլահը: Իրանը երկուսի սպանությունների համար մեղադրել է Իսրայելին: Վերջինս ստանձնել է միայն Նասրալլահի սպանության պատասխանատվությունը:
