Մենք միշտ էլ հայտնաբերել ենք թմրամիջոցներ, բայց մեր աշխատանքն իդեալական չէ և բավական բարելավումների տեղ կա, ես ձեզ խորհուրդ եմ տալիս googlе-ի միջոցով հարցնեք, թե ԵՄ տարածք տարեկան որքան կոկաին կամ այլ տեսակի թմրամիջոց է մտնում, իրենց մաքսային մարմիններն ի՞նչ գործողություններ են մշակում դրա դեմ պայքարելու համար:
Այս մասին Կառավարության նիստից հետո լրագրողների հետ զրույցում ասաց ՊԵԿ նախագահ Ռուստամ Բադասյանը:
«Եթե մաքսային մարմինը Հայաստան մտնող բեռները 100 տոկոս զննի, մինչև Փոթի հերթ կգոյանա: Պետք է ռիսկերի ճիշտ համակարգ ունենալ, ճիշտ թիրախավորել և ճիշտ անել և շատ կարևոր է համագործակցությունը տարբեր իրավապահ մարմինների միջ, միջազգային համագործակցությունը և այլն»,- ասաց Բադասյանը:
ԴԱՀԿ նախկին պետ Միհրան Պողոսյանը հայտարարել է, որ 1 տոննա է եղել կոկաինը, բայց 730 կգ է ձևակերպել, ի՞նչ եղավ այն 270-ը, Բադասյանն ասաց. «Մեզ մոտ գրանցվում է բեռնատարի քաշը, մարմինը զբաղվում է այդ գործով, այդ մարմնին հարցրեք»:
Հարցին էլ՝ Ձեզ բավարարո՞ւմ է թալանվածը հետ բերելու տեմպերը, թե՞ կարելի էր ավելի արդյունավետ աշխատել, նա նշեց, որ կարելի է ավելի արդյունավետ աշխատել, բոլորս էլ թերացել ենք:
«Մեր կարծիքը կարևոր չէ, կարևոր է հասարակության կարծիքը, իսկ հասարակության կարծիքն այն է, որ դանդաղ է ընթանում այդ պայքարը, թեև վերջին շրջանում մեծ հաջողություններ կան»,- ասաց նա:
Իսկ թե կոնկրետ Բադասյանն ինչով է մեղավոր, նա ասաց, որ միգուցե ավելի ջանասիրաբար պետք է աշխատեին, որ ավելի մեծ հաջողություններ ունենայինք:
Ճշտող հարցին էլ՝ ՊԵԿ նախկին նախագահ Գագիկ Խաչատրյանի vip հանգստյան սենյակը գոյություն ունի՞, Բադասյանն ասաց. «ՊԵԿ նախագահն ունի հանգստյան սենյակ, շատ անհարմար կաբինետ է, ոչ լուսավոր, շատ դեպրեսիվ, ցանկանում եմ փոփոխել»: