«Ժողովուրդ» թերթը գրում է. «ՀՀ Ազգային ժողովի հյուրասիրությունները մեկ անձից են կազմակերպվում՝ առանց մրցույթի: Մի կարգ, որը օրերս խնդրահարույց համարեց նաև ՊՎԾ նախագահ Ռոմանոս Պետրոսյանը:
«Ժողովուրդ» օրաթերթը բաց աղբյուրներից տեղեկացավ, որ 2024 թվականի հունվարից մինչև հոկտեմբեր ամիսը Ազգային ժողովի կարիքների համար պաշտոնական պատվիրակությունների ընդունելության, հյուրասիրության ծառայությունների ձեռքբերման համար կնքվել են մի քանի պայմանագրեր, որոնց ընդհանուր արժեքը կազմում է գրեթե 9 մլն դրամ։
Պայմանագրերը կնքվել են Ազգային ժողովի և «ԷՄ ԲԻ ՋԻ ԳՐՈՒՊ», «Դը Փաբլիք», «Բլիզարդ»,«Պաուլաներ», և «ՍԻՄՓԼ ԴԻԼ» ՍՊԸ-ների միջև։
Պայմանագրում առկա են ուշագրավ գնումներ. օրինակ՝ 20 գրամ սև ձկնկիթը՝ վերնագրված «պետության կարիքների համար»:
Թե երբ և ինչպես է «օգտագործվել» «Բլիզարդ» ՍՊԸ-ի հետ կնքած պայմանագրի արդյունքում մատակարարված սնունդը, մասնավորապես 20 գրամ ձկնկիթը, ԱԺ-ից հրաժարվել են պարզաբանելուց:
«ՀՀ Ազգային ժողովի 2024 թվականի կարիքների՝ պաշտոնական պատվիրակությունների ընդունման, հյուրասիրությունների կազմակերպման նպատակով ԱԺ-ի և «Բլիզարդ» ՍՊԸ-ի միջև կնքված պայմանագիրը հասանելի է գնումների կայքում»։
«Ժողովուրդ» օրաթերթի այն հարցմանը, թե որ պատվիրակության համար է կազմակերպվել գնումը, ԱԺ-ից ևս փաստացի հրաժարվել են պատասխանելուց՝ ուղղորդելով պաշտոնական կայք:
Գուցե ԱԺ աշխատակազմից տեղյակ չեն, որ բաց աղբյուրում դրված տեղեկությունը տեսնելով էինք հենց մանրամասներն իմանալու համար հարցում արել: Ամեն դեպքում, ստորև տեղադրենք «պետության կարիքների համար» գնված մթերքների ցանկը, որոնց համար կնքվել է պայմանագիրը, թե ովքեր են «պետության կարիքների համար» օգտվել այդ հյուրասիրությունից»։
