Երեկ ուշ երեկոյան տարբեր լրատվամիջոցներ հերթով հայտնում էին տարբեր պաշտոնյանների աշխատանքից հեռացման մասին լուրեր: Ձեզ ենք ներկայացնում պաշտոնանկությունների քրոնիկոնը:
Սկզբում SHAMSHYAN.com-ը հայտնեց, որ Նիկոլ Փաշինյանի մոտ են կանչվել ՏԿԵ նախարար Գնել Սանոսյանը և ՀՀ ՊԵԿ նախագահ Ռուստամ Բադասյանը։ Վարչապետը խիստ զրույց է ունեցել, ինչից հետո նրանք աշխատանքից ազատման դիմումներ են գրել։
Այնուհետև 24News-ը հայտնեց, որ իր տեղեկությունների համաձայն, աշխատանքից ազատման դիմում է ներկայացրել ՆԳ նախարար Վահե Ղազարյանը: Պատճառների մասին անգամ չգիտեն կառույցի ներսում:
Կայքը փորձել էր ՆԳՆ խոսնակ Նարեկ Սարգսյանի միջոցով ճշտել լուրը, սակայն վերջինս չի պատասխանել զանգերին:
Ըստ կայքի լուրերի, առաջիկայում ազատման դիմում կներկայացնի նաև Քննչական կոմիտեի նախագահ Արգիշտ Քյարամյանը:
Այնուհետև նույն կայքը հայտնեց, որ, ըստ լուրերի, ՏԿԵ նախարար Գնել Սանոսյանը և ՊԵԿ նախագահ Ռուստամ Բադասյանը ևս աշխատանքից ազատման դիմումներ են ներկայացրել։
ՀՀ հակակոռուպցիոն կոմիտեի նախագահ Սասուն Խաչատրյանը աշխատանքից ազատման լուրն առաջինը հայտնեց «ԴՕԿ-ի ձայնը»:
Օրենսդիրի հրաժարականների մասին առաջինը հայտնեց Radar Armenia-ն՝ ասելով, չճշտված տեղեկություններով, ԱԺ պատգամավորական մանդատները վայր կդնեն Հովիկ Աղազարյանը և Նարեկ Զեյնալյանը։
Թեև Հովիկ Աղազարյանը լրատվամիջոցներին նախ հայտնել էր, որ չկա նման բան, ապա ArmLur.am-ի հետ զրույցում չէր հերքել մանդատից հրաժարվելու մասին տարածված տեղեկությունը և հրաժարվել էր մեկնաբանել լուրը: