Սիրիայի ռազմաօդային ուժերը և Ռուսաստանի օդատիեզերական ուժերը Հալեպի նահանգի արևելքում հարձակվել են ահաբեկիչների դիրքերի վրա, ասվում է Սիրիայի պաշտպանության նախարարության հայտարարության մեջ, որը հրապարակել է SANA պետական գործակալությունը:
«Սիրիական և ռուսական ավիացիան մի շարք հարվածներ է հասցրել ահաբեկիչների կենտրոնացման վայրերին և նրանց շարժման ուղուն Հալեպի նահանգի արևելքում գտնվող Սֆիրի գյուղի տարածքում, ինչի հետևանքով տասնյակ ահաբեկիչներ են սպանվել և վիրավորվել»,- հայտնել են ռազմական գերատեսչությունից։
Չորեքշաբթի՝ նոյեմբերի 27-ին, «Հայաթ Թահրիր ալ Շամ» ահաբեկչական կազմակերպության խմբավորումները խախտել են դեէսկալացիայի համաձայնագիրը և հարձակվել Հալեպ և Իդլիբ նահանգների վրա։ Լայն ճակատով նրանք գրոհում են բնակավայրերն ու մարտական դիրքերը։
Սիրիական զորքերը պատասխանել են գրոհին, ինչի հետևանքով ահաբեկիչները կորուստներ են ունեցել կենդանի ուժի և տեխնիկայի առումով։ Սիրիայում պատերազմող կողմերի հաշտեցման ռուսական կենտրոնի ղեկավարի տեղակալ Օլեգ Իգնասյուկի խոսքով՝ նախորդ 24 ժամվա ընթացքում սիրիական բանակը ռուսական օդատիեզերական ուժերի աջակցությամբ ոչնչացրել է առնվազն 320 գրոհայինի։
Սիրիայի Արաբական Հանրապետությունում զինված հակամարտությունը շարունակվում է 2011 թվականից։ Այն բանից հետո, երբ բանակն ազատագրել է երկրի մեծ մասը, ահաբեկիչների ցրված խմբերը գործում են հյուսիսային և հյուսիս-արևելյան անապատային շրջաններում։ Դրանք պարբերաբար խոցում են քաղաքացիական և ռազմական մեքենաները մայրուղիներում և ահաբեկում հեռավոր գյուղերի բնակիչներին: Սիրիական զորքերը շարունակում են ակտիվ թիրախային գործողությունները՝ ոչնչացնելու մնացած զինյալ խմբավորումներին։