Մենք ունենք 604 միլիարդ ճեղքվածք, սա մեր բոլորիս մտքի մեջ է, որ 604 միլիարդը պակասում է։ Այս մասին, ԱԺ-ում դիմելով ֆինանսների նախարար Վահե Հովհաննիսյանին, ասաց «Քաղաքացիական պայմանագիր» խմբակցության պատգամավոր Խաչատուր Սուքիասյանը:
«Կասե՞ք այն գործիքները, որով պետք է դա լրացենք: Օրինակ, արդյունավետություն, վարչարարություն, նոր գեներացիա, որտեղ պետք է ներդրումներ կատարեք, որ մեզ նոր գեներացիա ապահովի, որ դուք օգոստոսին ասեք՝ մեզ այդ 604-ը չէ, այլ 500 է պետք։
Ի՞նչ կարգի գործողություններ եք անելու, որ ավելի արդյունավետ մենք հասնենք նրան, որ այդ գումարների մեծ մասն էլ միայն ու միայն ծառայի գեներացիայի համար»,- հարցրեց պատգամավորը:
Նախարարը նշեց, որ հարցը բյուջեի քննարկման բոլոր փուլերում իրենց ուշադրության կենտրոնում է: «Պետք է ցավով ասեմ, որ կան որոշակի սոցիալական նաև պարտավորություններ, որոնք մենք պետք է իրականացնենք: Ինչպես գիտեք՝ մեր բյուջեի մի ահռելի հատված գնում է այդ ուղղությամբ, որ միևնույն ժամանակ, իհարկե, էկոնոմիկայի նախարարության հետ քննարկում ենք այն աջակցության գործիքները, որոնք պետք է թիրախային աջակցություն ցույց տան մեր առանձին ոլորտներին»,- ասաց նա:
Նրա խոսքով՝ վերջին ընդունած ՏՏ ոլորտի աջակցության ծրագիրը հենց Սուքիասյանի նշած աջակցության ծրագիր է:
«Այսինքն մեր ակնկալիքն այնպիսին է, որ ինքը նոր գեներացիա պետք է ապահովի: Իհարկե, ժամանակը կանցնի, կգնահատենք, կտեսնենք՝ ինչքանով էր մեր կարծիքը ճիշտ:
Կապիտալ ծախսերի մակարդակի բարձրացումը և դրա իրականացման արդյունավետության բարձրացումը, դա այն հիմնական գործոններից է, երբ որ մենք խոսում ենք պոտենցիալի բարձրացման մասին, մեր պոտենցիալը բարձրացել է նաև այս կապիտալ ծախսերի ավելացման շնորհիվ, որն էականորեն նաև ավելացել է 2025 թվականի բյուջեով և այստեղ, իհարկե, գիտենք, որ մի զգալի մաս է կազմում նաև պաշտպանության նախարարության կապիտալ ծախսերին»,- ասաց նա:
