Չարաճճի պատգամավորներն ու ֆեյք Ձմեռ պապը. Աղազարյանին ուղարկում են Լապլանդիա

Այս տարի ո՞վ է վատ աշխատել խորհրդարանում, ո՞ւմ տանել Լապլանդիա․ Ազգային ժողով այցելած Ձմեռ պապը այս հարցով դիմեց իշխանական ու ոչ իշխանական պատգամավորներին։

Պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանը վիճեց Ձմեռ պապի հետ, թե՝ «Դու Լապլանդիայից չես եկել, ե՛ս եմ Լապլանդիայից եկել»։

ՔՊ-ական Նարեկ Բաբայանը՝ Լենա Նազարյանի ամուսինն առաջարկեց տանել խմբակցությունից վերջերս հեռացված Հովիկ Աղազարյանին։ Աղազարյանը հակադարձեց՝ ՔՊ-ականների մուրազը չի կատարվի, ուզում են իրեն ուղարկել Լապլանդիա, որ մանդատը վայր դնի․ «Դրա տակ ենթատեքստ կա, որ ես մանդատս վայր դնեմ, բայց ես մանդատս չեմ դնի։ Ձմեռ պապին իրանց խնդրանքները չի կատարելու էս տարվա»։

Աղազարյանի ընկերը՝ Հակոբ Ասլանյանն ասաց՝ թող Ձմեռ պապն ինքը որոծի՝ ում տանել հյուսիս։
ՔՊ պատգամավոր Վիլեն Գաբրիելյանը վստահ էր, որ ԱԺ–ում բոլորն են իրենց վատ պահել՝ իրենից սկսած։
ՔՊ պատգամավոր Գագիկ Մելքոնյանը հարցին՝ որոշ բալիկներն իրենց չարաճճի են պահում, ո՞ւմ հետս տանեմ Լապլանդիա, պատասխանեց․ «Մանուկյան Գեղամին տարեք, էնտեղ իրա կարիքը կա»։

Անդրանիկ Քոչարյանը Ձմեռ պապին հանձնեց ընկերոջը․ «Արմեն Խաչատրյանին տարեք, բա ո՞ւմ տանես, ուրիշ չարաճճի մարդ չկա»։
«Հայաստան» խմբակցության պատգամավոր Լիլիթ Գալստյանն առաջարկեց տանել ԱԺ նախագահին՝ Ալեն Սիմոնյանին․ «Կառաջարկեի Ալեն Սիմոնյանին վերցնել ու միասին ուղեւորվել դեպի Լապլանդիա եւ ճանապարհին բարեվարքության շուրջ զրույցներ ունենալ՝ անցնելով ժողովրդավարական երկրների սահմաններով, որովհետեւ Լապլանդիան, ըստ լեգենդի, Ֆինլանդիայի հյուսիսում է․․․Ես կուզենայի, որ Ալեն Սիմոնյանին ուղեկցեր Նիկոլ Փաշինյանը, կամ միգուցե Նիկոլ Փաշինյանն ուղեկցեր Ալեն Սիմոնյանին»։

ԱԺ լսումներին մասնակցող Էդգար Ղազարյանը Ձմեռ պապի հետ ուզում էր ճանապարհել վարչապետին․ «Եթե կարելի ա, WhatsApp–ով սմս ուղարկողին տարեք։ Մի հատ վարչապետ ունենք մենք, էդ պաշտոնում հայտնված մարդ, եթե կարելի ա, իրա վրա սիրուն բանտիկները կապեք, փաթաթեք, եթե Ադրբեջան գնալու հնարավորություն եք ունենալու, տարեք հանձնեք Իլհամ Ալիեւին՝ որպես իրան Նոր տարվա նվեր»։

Լրագրող Կարինե Մանգասարյանը նույնպես խնդրեց Ձմեռ պապին իր հետ տանել Փաշինյանին․ «Թող մի քիչ էլ էնտեղ լավ կառավարի։ Այստեղ հիանալի է։ Ինձ թվում է՝ այնտեղ իր կարիքը ավելի շատ կզգան, ձները կմաքրի, ասֆալտ փռել․․․ հիանալի կլինի»:

«Հայաստան» խմբակցության պատգամավոր Արթուր Խաչատրյանը դեմ էր․ «Հյուսիս մի տարեք, ափսոս է հյուսիսը, մի մնդռեք, սպիտակ ձյուն ա»։
Թե ինչ անեկդոտ պատմեց Աղազարյանը Ձմեռ պապին ու որ պատգամավորը հանելուկին պատասխանեց, մանրամասները տեսանյութում…