ԱՄՆ-ում կլինի երկու սեռ՝ արական և իգական, կդադարեն ԱՄՆ բոլոր անօրինական ներթափանցումները, Մեքսիկական ծոցը կանվանվի Ամերիկյան ծոց. Թրամփի՝ որպես նախագահ առաջին հայտարարությունները

Այսօր ես կստորագրեմ մի շարք պատմական գործադիր հրամաններ, որոնք կսկսեն Ամերիկայի ամբողջական վերականգնումը: Այս մասին հունվարի 20-ին երդմնակալության արարողության ժամանակ հայտարարել է Միացյալ Նահանգների 47-րդ նախագահ Դոնալդ Թրամփը։

«Առաջին հերթին ես համազգային արտակարգ դրություն եմ հայտարարում մեր հարավային սահմանին։
ԱՄՆ բոլոր անօրինական ներթափանցումները կդադարեն, և կսկսվի միլիոնավոր հանցագործ տարրերի վերադարձն այնտեղ, որտեղից նրանք եկել են:
Ես զորքեր կուղարկեմ մեր հարավային սահման՝ հետ մղելու մեր երկիր այս ներխուժումը, որն իսկական աղետ է դարձել», — հավելել է Թրամփը։

Նա հայտարարել է կարտելներն «ահաբեկչական կազմակերպություններ» հռչակելու մասին հրամանագիր ստորագրելու մտադրության մասին։

Թրամփը խոսել է նաև միայն երկու սեռի գոյության մասին․

«Այսօրվա դրությամբ ԱՄՆ պաշտոնական քաղաքականությունն է ճանաչել միայն երկու սեռ՝ արական և իգական»,-հայտարարել է նա։

«Մենք կփոխենք Մեքսիկական ծոցի անվանումը և կանվանենք այն Ամերիկյան ծոց, մենք կվերականգնենք մեր հեղինակությունը»: Այս մասին հունվարի 20-ի երդմնակալության արարողության ժամանակ հայտարարել է ԱՄՆ 47-րդ նախագահ Դոնալդ Թրամփը:

«Ամերիկան կվերադարձնի իր արժանի տեղը՝ որպես երկրի վրա ամենահզոր, ամենաարդար ազգ, և մենք կոգեշնչենք այլ պետություններին»,- նշել է նա:

Դոնալդ Թրամփն անդրադարձել է ԱՄՆ-ում ճգնաժամերի լուծման անհրաժեշտությանը։

«Մարդիկ կորցրել են ուժը, այն նրանցից խլել են, թվում է՝ ոչինչ հնարավոր չէ ուղղել․ ներկայիս կառավարությունը չի կարող լուծել երկրի ներսում առկա ճգնաժամը, միաժամանակ իրար հաջորդում են աղետները, մեր կառավարությունը չի ապահովում երկրի պաշտպանությունը, օրինապահ քաղաքացիների պաշտպանությունը, մենք տեսնում ենք ներգաղթյալների, որ ամբողջ աշխարհից գալիս են։ Կառավարությունը ֆինանսավորում է ամբողջ աշխարհի մակարդակով բոլոր երկրների սահմանների պաշտպանությունը, բայց չի պաշտպանում մեր երկրի սահմանները, չի պաշտպանում մեր ժողովրդին»,-ասել է նա։

Թրամփը նշել է, որ երկրում դժվարին ժամանակներ են։

«Հյուսիսային Կարոլինայի հրաշալի ժողովրդի հետ անարդար վարվեցին, մյուս նահանգներում, որոնք փոթորիկը քանդեց, Լոս Անջելեսում, որտեղ դեռ հրդեհներ են, մեզ պաշտպանություն է պետք, մենք տեսնում ենք՝ բազմաթիվ մարդիկ, որ այսօր միացել են, պարզապես անտուն են մնացել, մենք դա թույլ տալ չենք կարող, այդպես թողնել չի կարելի։ Այսօր, այս պահին ամեն ինչ կփոխվի և կփոխվի շատ արագ։ Ինձ մանդատ է տրվել ամբողջությամբ վերադարձնելու ժողովրդի հավատը, բարգավաճումը, նրանց ազատությունն ու ժողովրդավարությունը՝ սկսած այս պահից։ ԱՄՆ-ն այլևս չի գնա ներքև, չի սահի անդունդ, մեր մեծ ժողովրդի մեծ ճակատագիրը կվերադարձվի»,- նշել է Թրամփը։