Վարչական դատարանի աշխատակիցները, թեև դադարեցրել են գործադուլը, սակայն աշխատավարձերը բարձրացնելու հարցը շարունակում է մնալ առկախված, վերջնական համաձայնության չեն եկել։ Այս մաին հայտնում է «Փաստինֆո»-ն։
Հիշեցնենք, որ հունիսի 24-ին և 25-ին Վարչական դատարանի աշխատակազմի անդամները՝ նիստերի քարտուղարները, գրասնյակի աշխատակիցները, դատավորների օգնականները, գործադուլ էին հայտարարել՝ պահանջելով իրենց աշխատավարձերը։ Գործադուլի օրերի ընթացքում դատարանի աշխատանքը պարալիզացվել էր՝ ոչ դատական նիստեր են եղել, ոչ՝ նոր հայցեր ներկայացվել։ Դատարանի աշխատակիցներն ահազանգում են, որ գերծանրաբեռնված աշխատանքի պայմաններում ստանում են չնչին աշխատավարձ, ավելին, որոշ տեղեկությունների համաձայն՝ աշխատակիցները զրկվել են անգամ հավելավճարից, պարգևավճարից և, ըստ շրջանառվող լուրերի, պայմանով, որ դրա փոխարեն պետք է հիմնական աշխատավարձը բարձրացվեր, ինչն այդպես էլ չի եղել։ Դատական դեպարտամենտը հունիսի 24-ին հայտարարությամբ էր հանդես եկել՝ նշելով, որ Դատական իշխանությունը, դեռևս 2023 թվականից, տարբեր մակարդակներում, տարբեր միջոցներով բազմիցս բարձրացրել է այս ցավոտ խնդիրը և, որ Դատական դեպարտամենտը և Դատական իշխանության մյուս մարմիններն իրենց լիազորությունների շրջանակում բոլոր հնարավոր գործողությունները կատարել են, և հարցը գտնվում է պետական պատշաճ մարմինների ուշադրության կենտրոնում։ Միևնույն ժամանակ, կառույցը դեմ չի եղել, որ աշխատակիցներն անցնեն ավելի բարձր վարձրատրությամբ աշխատանքի։
«Հուսով ենք՝ դատական ծառայողները բարձր պատասխանատվությամբ կշարունակեն իրենց աշխատանքը` կարևորելով արդարադատության շահը, իսկ անձնական հանգամանքներով պայմանավորված անհնարինության դեպքում՝ իրենց ծառայությունը կիրականացնեն ավելի բարձր վարձատրվող ոլորտներում, մինչև աշխատավարձերի խնդրի համակարգային լուծումը»,- նշված էր հայտարարությունում։
Երկու օր տևած գործադուլի արդյունքում աշխատակիցները որոշել են դադարեցնել գործադուլը, թեև հարցին լուծում այդպես էլ չի տրվել, համենայն դեպս, ինչպես «Փաստինֆո»-ի հետ զրույցում հայտնեց Վարչական դատարանի խոսնակ Աբրահամ Աբրահամյանը՝ վերջնական որևէ որոշում կամ համաձայնություն չի եղել՝ կապված աշխատավարձերի հետ։ Նրա խոսքով՝ Վարչական դատարանի նախագահը, աշխատակազմի ղեկավարը հորդորել են բոլոր աշխատակիցներին՝ վերադառնալ աշխատանքային վիճակի, զրույցներ ունեցել բոլորի հետ, ինչից հետո՝ կարճ ժամանակվա ընթացքում բոլորը վերադարձել են աշխատանքի։ Աշխատանքից ազատվող ծառայողներ չեն եղել։ Թե ինչ հետևանքներ կան երկօրյա գործադուլի հետևանքով՝ այս պահին դեռևս հայտնի չէ։ Հայտնի չէ նաև, թե երբ հնարավոր կլինի լուծել աշխատավարձի հարցը, սակայն իրականացվող քայլերի առնչությամբ դատարանի խոսնակը վերահաստատեց ավելի վաղ արված հայտարարությունը։