Սլովակիայի վարչապետ Ռոբերտ Ֆիցոն Սլովակիայի խորհրդարանի տնտեսական հանձնաժողովի նիստում շարունակել է Ուկրաինայի տարածքով ռուսական գազի տարանցման վերաբերյալ քննարկումը` նախագահ Վլադիմիր Զելենսկին անվանելով Սլովակիայի «թշնամի»: Այս մասին գրում է e.dennikn.sk կայքը:
«Մեր թշնամին Զելենսկին է։ Զելենսկին է առաջացրել մեր խնդիրները։ Ես նրան չեմ սիրում, քանի որ նա վնասում է Սլովակիային», — ասել է Ֆիցոն։
Վերջինիս հայտարարությունը վերաբերում է Սլովակիա-Ուկրաինա հարաբերությունների սրմանը, ինչն առաջացել է այն բանից հետո, երբ Զելենսկին 2025-ի սկզբից դադարեցրել է երկրի տարածքով Ռուսաստանից գազի տարանցումը Սլովակիա։
Մասնավորապես, Սլովակիայի վարչապետը մեկնաբանել է Վլադիմիր Զելենսկու վերջին հայտարարությունն այն մասին, որ հնարավոր է Ադրբեջանից եվրոպական երկրներ գազի տարանցում կազմակերպել:
Ֆիցոն ասել է, որ Ուկրաինայի նախագահին այլ բան չի մնում, քան խոսել «Ադրբեջանից գազի տարանցման մասին»:
Նա կրկնել է, որ Բրատիսլավան «ամենաիրատեսական» տարբերակն է համարում միայն ռուսական գազի տարանցումը վերականգնելը:
