ԵՄ Խորհուրդն այսօր որոշում է ընդունել Հայաստանում Եվրոպական միության առաքելության մանդատը ևս երկու տարով՝ մինչև 2027 թվականի փետրվարի 19-ը երկարաձգելու մասին, ավելի քան 44 միլիոն եվրո բյուջետային հատկացումներով՝ 2025 թվականի փետրվարի 20-ից մինչև 2027 թվականի փետրվարի 19-ն ընկած ժամանակահատվածի համար:
«ԵՄ առաքելությունը տարածաշրջանում խաղաղության և կայունության պահպանմանն ուղղված ԵՄ ջանքերի կարևոր բաղադրիչն է: Առաքելության խնդիրն է տեղում հետևել և զեկուցել իրավիճակի մասին, նպաստել հակամարտությունից տուժած շրջաններում մարդկանց անվտանգության ապահովմանն ու հնարավորինս աջակցել Հայաստանի և Ադրբեջանի միջև վստահության ամրապնդմանը: Մանդատով նախատեսված առաքելության խնդիրները մնում են անփոփոխ. ԵՄ առաքելությունը եղել է և կմնա անզեն քաղաքացիական առաքելություն»,- նշված է որոշման մեջ:
Մարկուս Ռիտերի գլխավորած առաքելության կազմում ընդգրկված է ավելի քան 200 աշխատակից, ներառյալ՝ միջազգային և տեղական անձնակազմը: ԵՄ առաքելության դիտորդներն ու քաղաքացիական փորձագետները ներկայացնում են ԵՄ անդամ 25 պետություն և երրորդ աջակցող պետություն Կանադան: ԵՄ առաքելությունն ստեղծվել է Խորհրդի որոշմամբ՝ 2023 թվականի փետրվարի 20-ին, և նույն ժամանակ էլ սկսել է իր գործունեությունը:
