«Հրապարակ օրաթերթ»-ը գրում է. «Իշխանությունները ցնծության մեջ են Վարդան Ղուկասյանի՝ Դոգի աճող վարկանիշից, որը տեսանելի է դառնում վերջին շրջանի սոցհարցումներով։ Իշխանության առանցքային ներկայացուցիչները մասնավոր զրույցներում չեն թաքցնում, որ Դոգն իրենց համար գտնված, երանելի ընդդիմություն է` նախ այն պատճառով, որ իրենց փոխարեն ոչնչացնում է դաշտի մյուս ընդդիմադիր ուժերին, դրա հետ մեկտեղ էլ կառավարելի է եւ կարող են Երեւանի օրինակով միշտ լեզու գտնել նրա հետ` նաեւ գալիք համապետական ընտրություններից հետո։ Բացի այդ, եթե մինչեւ հաջորդ ընտրությունները Դոգին հաջողվի ընդդիմադիր զանգվածի ֆավորիտը դառնալ, ինչը նրան հաջողվում է սեռական բնույթի հայհոյանքի և անխնա բոլորին վարկաբեկելու ճանապարհով, ապա կկատարվի իշխանության մեծագույն երազանքը եւ Հայաստանի գիտակից քաղաքացիների զգալի հատվածը հաշվարկելով, որ իրենց քվեով բան չեն կարող փոխել, պարզապես չեն մասնակցի քվեարկությանը, իշխանության կայուն ընտրազանգվածը ցածր մասնակցության դեպքում մեծամասնություն կկազմի։ Իսկ բողոքավոր զանգվածն էլ կգնա ու կընտրի Դոգին»:
