Ուկրաինայի նախագահ Վոլոդիմիր Զելենսկին ասել է, որ հրաժարվել է ստորագրել Մյունխենի անվտանգության համաժողովի շրջանակում ամերիկյան պատվիրակության հետ հանդիպման ժամանակ առաջարկված համաձայնագիրը՝ Միացյալ Նահանգներին ուկրաինական հազվագյուտ հողային օգտակար հանածոների հասանելիություն տրամադրելու վերաբերյալ, քանի որ փաստաթուղթը չափազանց կենտրոնացած է ամերիկյան շահերի վրա:
«Իմ կարծիքով՝ այն պատրաստ չէ պաշտպանել մեզ, մեր շահերը»,- ասել է Զելենսկին Associated Press-ին։
Թրամփի վարչակազմը հայտարարել է, որ շահագրգռված է օգտվել Ուկրաինայի կարևոր հանքանյութերի հսկայական պաշարներից՝ Չինաստանից կախվածությունը նվազեցնելու համար: Սակայն Զելենսկին հնարավոր շահագործումը կապել է Ուկրաինայի անվտանգության երաշխիքների հետ, որոնք ապագայում կզսպեն հավանական ռուսական ագրեսիան:
Ըստ անանուն ուկրաինացի պաշտոնյայի՝ առաջարկը, որը ԱՄՆ փոխնախագահ Ջեյ Դի Վենսի հետ Զելենսկու բանակցությունների առանցքային մասն էր, անվտանգության հատուկ երաշխիքներ չի առաջարկել Ուկրաինային:
Սպիտակ տան Ազգային անվտանգության խորհրդի մամուլի քարտուղար Բրայան Հյուզն էլ հայտարարել է, որ «նախագահ Զելենսկին անհեռատեսորեն է մոտենում այն ոսկե հնարավորությանը, որը Թրամփի վարչակազմն առաջարկել է Ուկրաինային»:
Հյուզը ներկայացրել է Սպիտակ տան դիրքորոշումը, ըստ որի «ԱՄՆ-ի հետ սերտ տնտեսական կապերը կլինեն ապագա ագրեսիայի դեմ լավագույն երաշխիքը և կայուն խաղաղության անբաժանելի մասը»։