ՔՊ-ական պատգամավորեր Արսեն Թորոսյանն ու Հասմիկ Հակոբյանը որոշել են նախաձեռնել փոփոխություն ՀՀ քրեական օրենսգրքում, որպեսզի մասնագիտական պարտականությունները կատարելիս բուժաշխատողների նկատմամբ բռնություններն ավելի խիստ պատիժ ունենան։
«Այսօրվա կարգավորումներով հատուկ առանձնացված չէ բուժաշխատողների դեպքը, իհարկե, կան ծանրացուցիչ հանգամանքներ՝ մասնագիտական գործունեության իրականացման ժամանակ բռնություն կիրառելու մասով, բայց դա, կարծում եմ, բավարար չէ։ Մենք պետք է հստակ հաղորդագրություն ուղարկենք բոլորին, որ սա անթույլատրելի է»,- նշել է Արսեն Թորոսյանը։
Նա կոչ է արել հասարակությանը հարգանքով վերաբերվել բոլոր բուժաշխատողներին։
Հիշեցնենք՝ փետրվարի 24-ին Հայաստանում բուժաշատողների նկատմամբ բռնության հերթական դեպքն էր արձանագրվել։ Արմավիր քաղաքի 37-ամյա և Մեծամոր քաղաքի 20-ամյա բնակիչները ծեծի էին ենթարկել շտապօգնության աշխատակիցներին։
Բռնության մեկ այլ դեպք էլ տեղի էր ունեցել փետրվարի 21-ին՝ Շիրակի մարզում։ Պացիենտը հարձակվել էր բուժակի վրա, կիրառել բռնություն, անգամ օգտագործել մոխրաման՝ հարվածելով բուժակի մարմնի տարբեր մասերին և դեմքին: