Աշխարհահռչակ հայ գործարար Նուբար Աֆեյանն ուղերձով դիմել է ՀՀ վարչապետ Նիկոլ Փաշինյանին և հայ ժողովրդին։
«Անտանելի է տեսնել ադրբեջանական ռեժիմի կողմից իմ վաղեմի բարեկամ և գործընկեր Ռուբեն Վարդանյանին հասցված ցավն ու անարդարությունը: Ժամանակն է, որ բոլոր հայերը, հատկապես Հայաստանի Հանրապետության ղեկավարությունը, իրենց ձայնը բարձրացնեն»,- հայտարարել է Աֆեյանը։
«Եթե ոչ մենք, ապա՝ ո՞վ։ Եթե ոչ հիմա, ապա՝ ե՞րբ»,- հավելել է նա։
Հիշեցնենք՝ Ռուբեն Վարդանյանը հացադուլ է սկսել՝ իր բողոքն արտահայտելով Ադրբեջանում ընթացող դատական ֆարսի դեմ։
Ռուբեն Վարդանյանը բարձրաձայնել է իր իրավունքների կոպտագույն խախտումների, հոգեբանական ճնշումների մասին, նաև, որ զրկված է պաշտպանության իրավունքից, 422 հատորանոց ու սխալներով թարգմանված գործի նյութերին ծանոթանալու բավարար ժամանակ չեն տրամադրել, իսկ իր միջազգային իրավաբանական թիմին արգելվել է շփվել կամ հանդիպել իր հետ ու ստանալ գործի նյութերը:
Ռուբեն Վարդանյանի միջազգային փաստաբան Ջարեդ Գենսերի հայտարարությամբ էր հանդես եկել՝ նշելով, որ Ռուբեն Վարդանյանի առողջությանը և անվտանգությանը լրջագույն վտանգ է սպառնում։
Տեսաուղերձով էր հանդես եկել նաև Ռուբեն Վարդանյանի որդին՝ հայտարարելով, որ հայրը ենթարկվել է խոշտանգումների։
