Սաուդյան Արաբիայի մայրաքաղաք Էր Ռիադում ԱՄՆ-ի և ՌԴ-ի պատվիրակությունների հանդիպման ժամանակ ամերիկյան կողմն ասել է, որ ցանկանում է Մոսկվայի հետ նորմալ հարաբերություններ՝ ընդգծելով, որ Դոնալդ Թրամփի վարչակազմի օրոք ամերիկյան արտաքին քաղաքականության հիմքը ԱՄՆ ազգային շահերի պաշտպանությունն է. այս մասին ամերիկացի բլորգներ Էնդրյու Նապոլիտանոյին, Լարի Ջոնսոնին և Մարիո Նաուֆալին տված հարցազրույցում ասել է ՌԴ ԱԳ նախարար Սերգեյ Լավրովը:
«Միաժամանակ, ամերիկացիները հասկանում են, որ այլ երկրներ նույնպես ունեն իրենց ազգային շահերը։ Եվ նրանք պատրաստ են լուրջ բանակցությունների այս պետությունների հետ, որոնք ունեն իրենց ազգային շահերը և չեն ցանկանում հնազանդվել ուրիշներին։ Ակնհայտ է, որ ԱՄՆ-ն ու Ռուսաստանը պետություններ են, որոնց ազգային շահերը երբեք նույնը չեն լինի։ Նրանք չեն կարող լիովին համընկնել, նույնիսկ 50%-ով: Բայց երբ դրանք համընկնում են, նման իրավիճակներում մենք՝ որպես պատասխանատու քաղաքական գործիչներ, պետք է ամեն ինչ անենք այդ նմանությունները զարգացնելու, դրանք գործնականում կիրառելու համար, որպեսզի դրանք զարգանան ի շահ կողմերի՝ լինեն դա տնտեսական, ենթակառուցվածքային նախագծեր, թե այլ բաներ», — ասել է Լավրովը։
Նրա խոսքով՝ եղել է նաև «ազդակ», որ երբ շահերը չեն համընկնում կամ հակասում են, պատասխանատու երկրները պետք է ամեն ինչ անեն, որպեսզի այդ հակասությունները չվերաճեն առճակատման։ «Մենք նրանց ասացինք, որ լիովին կիսում ենք այս տրամաբանությունը։ Ռուսաստանի նախագահ Վլադիմիր Պուտինն ունի հենց այսպիսի մոտեցում մեր արտաքին քաղաքականության իրականացմանը։ Նախագահ դառնալու պահից նա անընդհատ իր շփումներում շեշտում է, որ մենք որևէ մեկին ոչինչ չենք պարտադրում և ձգտում ենք շահերի հավասարակշռություն գտնել։ Այսինքն՝ տրամաբանությունը բացարձակապես նույնն է», — ասել է Լավրովը։