Հանրապետությունում շարունակվում է սուր շնչառական վարակներով պայմանավորված հիվանդացության ակտիվությունը։ Այն պայմանավորված է մի քանի գործոնով՝ վիրուսների առանձնահատկություններ, փակ տարածքներում մարդկանց կուտակումներ, վիրուսների փոխանցման մեխանիզմներ։
«Արմենպրես»-ի հետ զրույցում ՀՀ առողջապահության նախարարության Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Զարուհի Գրիգորյանը նշեց, որ աշխարհի բազմաթիվ երկրներում ևս սուր շնչառական վարակների առումով համաճարակային իրավիճակը լարված է։
-Տիկին Գրիգորյան, կարմրուկի, գրիպի, սուր շնչառական վարակների առումով համաճարակային ի՞նչ իրավիճակ է այժմ Հայաստանում:
-Հայաստանում 2025 թվականին կարմրուկի դեպքեր չեն գրանցվել: Ինչ վերաբերում է գրիպին և սուր շնչառական վարակներին, ապա նախորդ շաբաթվա ընթացքում շարունակվել է սուր շնչառական վարակներով պայմանավորված ակտիվություն։ Շարունակաբար իրականացվող լաբորատոր հետազոտությունների արդյունքները փաստում են, որ հանրապետությունում շրջանառվում են գրիպի Բ տեսակի հարուցիչները, իսկ շնչառական այլ վարակներից՝ ռեսպիրատոր սինտիցիալ վիրուսի հարուցիչը:
-Իսկ ի՞նչ իրավիճակ է աշխարհում:
-Աշխարհում կարմրուկի և սուր շնչառական վարակների առումով համաճարակային իրավիճակը լարված է: 2024 թվականին ամբողջ աշխարհում գրանցվել է կարմրուկի 359 հազար 521 դեպք: ԱՀԿ-ն հայտնում է եվրոպական տարածաշրջանում վերջին 25 տարում կարմրուկի ամենաշատ դեպքերի գրանցման մասին: Միայն 2023 թվականին տարածաշրջանում 500 հազար երեխա բաց է թողել կարմրուկի դեմ պատվաստանյութի առաջին դեղաչափը: Այս առումով մեր երկրում վիճակը կայուն է, սակայն իրազեկման աշխատանքները շարունակում ենք:
-Արդեն գարուն է, սակայն, ինչպես ասացիք, շարունակվում է սուր շնչառական վարակներով պայմանավորված ակտիվությունը։ Ինչո՞վ է պայմանավորված, նաև՝ ի՞նչ է պետք անել վիրուսներից խուսափելու համար:
-ՍՇՎ-ների սեզոնի ժամանակահատվածում, բնականաբար, մեծանում է հիվանդանալու հավանականությունը։ Այն պայմանավորված է մի քանի գործոնով՝ վիրուսների առանձնահատկություններ, փակ տարածքներում մարդկանց կուտակումներ, վիրուսների փոխանցման մեխանիզմներ։
Ի վերջո, կարմրուկի և սեզոնային գրիպի կանխարգելման ամենաարդյունավետ միջոցը պատվաստումն է: Բժշկական օգնություն և սպասարկում իրականացնող բոլոր կազմակերպություններն ապահովված են սեզոնային գրիպի, ինչպես նաև կարմրուկի, կարմրախտի, խոզուկի դեմ համակցված պատվաստանյութերով: Յուրաքանչյուր ոք, ով չի պատվաստվել, կարող է դիմել պոլիկլինիկա/ամբուլատորիա և պատվաստվել:
-Ո՞րն է առողջապահության նախարարության մասնագետների խորհուրդը, հորդորը, ի՞նչ կանխարգելիչ միջոցառումներ պետք է իրականացվեն:
-Պատվաստվե՛ք կարմրուկի և սեզոնային գրիպի դեմ, խուսափե՛ք գրիպանման երևույթներով հիվանդների հետ շփումից, եթե հիվանդ եք, մնացե՛ք տանը, հրավիրե՛ք տեղամասային մանկաբույժին, թերապևտին կամ ընտանեկան բժշկին և մի՛ զբաղվեք ինքնաբուժմամբ, մի՛ օգտագործեք հակաբիոտիկներ, քանի որ դրանք ցուցված չեն գրիպի և սուր շնչառական վարակների բուժման համար, հագնվե՛ք եղանակին համահունչ, պահպանե՛ք հազի և փռշտալու վարվելակարգը, օգտագործե՛ք հնարավորինս շատ հեղուկներ, հաճախակի օդափոխե՛ք փակ տարածքները, հետևե՛ք անձնական հիգիենայի կանոններին։
