ԵՄ խորհրդի որոշմամբ նոր հայտ ենք ներկայացրել մուտքի արտոնագրերի ազատականացման շուրջ, երկխոսությունը, բանակցությունները շարունակվում են. Եվրոպական ինտեգրման հարցերի մշտական հանձնաժողովի նիստին հայտարարեց ԱԳ փոխնախարար Պարույր Հովհաննիսյանը։
«Կարծում եմ, որ գործընթացը հնարավորինս արագ կունենա արդյունավետ ընթացք, որպեսզի առանց վիզայի ռեժիմի համակարգը գործի Հայաստանի քաղաքացիների համար։ Մենք բարձր ենք գնահատում Եվրամիության և անդամ երկրների ամբողջ վճռականությունը՝ Հայաստանին աջակցելու հարցում»,- շեշտեց փոխնախարարը:
«Հայաստան» դաշինքի պատգամավոր Արմեն Գևորգյանը հետաքրքրվեց, թե մուտքի արտոնագրերի ազատականացման ռեժիմը կոնկրետ ե՞րբ կլինի, թե՞ ամեն անգամ պետք է հավաքվեն ու ասեն, որ բանակցում են։
Փոխնախարարը նշեց՝ կուզենար հիմա ստույգ ասել, որ կավարտեն 2 կամ 3 տարվա ընթացքում․«Բայց, իսկապես, դա ո՛չ հնարավոր է, ո՛չ էլ տեղին։ ԵՄ գործընկերները միշտ խուսափում են դեդլայներ, կոնկրետ թվեր նշել, բայց այստեղ կարող ենք դիտարկել այլ երկրների փորձը, երբ նման գործընթացները տևում են 3-ից 6 տարի»։
Փոխնախարարը նկատեց, որ հայկական կողմը բավական լավ է նախապատրաստվել այդ բանակցություններին։
«Փորձում ենք մի շարք քայլեր անել մինչև բանակցությունների մեկնարկը, անգամ եվրոպական գործընկերները հայտնել են, որ պատրաստվածության առումով հաճելիորեն զարմացած են։ Իմ կարծիքով, այդ գործընթացն առավել արագ կանցնի, քան մի շարք այլ երկրների դեպքում»։