Թուրքիայի նախագահ Ռեջեփ Թայիփ Էրդողանը հայտարարել է, որ մտադիր չէ կրկին առաջադրվել նախագահի պաշտոնում, սակայն երկրին անհրաժեշտ է նոր սահմանադրություն: Այս մասին, ՏԱՍՍ-ի փոխանցմամբ, նա ասել է Հունգարիայից վերադառնալու ճանապարհին լրագրողների հետ զրույցում։
«Ես չեմ պատրաստվում վերընտրվել կամ նորից առաջադրվել, մենք միայն մտահոգված ենք, թե ինչպես կարող ենք բարելավել մեր երկրի հեղինակությունը:
Թուրքիան փոխվում է, աշխարհը փոխվում է. Մենք ապրում ենք նոր դարաշրջանում. Այսպիսի արագ փոփոխվող աշխարհում մի՞թե կարելի է ինչ-որ բանի հասնել սահմանադրությամբ, որը ստեղծվել է հին Թուրքիայում հեղաշրջման պայմաններում և դեռ պահպանում է հեղաշրջման մտածելակերպը:
Թուրքիան այլևս չի կարող շարժվել դեպի ապագա պուտչիստների կողմից գրված և առաջարկված սահմանադրությամբ։ Այժմ մեզ անհրաժեշտ է սահմանադրություն, որն առաջարկվում է ոչ թե դավադիրների, այլ քաղաքացիական անձանց կողմից»,- ասել է Էրդողանը:
Թուրքիայի ղեկավարը հավելել է, որ իր «Արդարություն և զարգացում» կուսակցությունն աշխատում է նոր սահմանադրության մշակման վրա։ Նա նաև ընդդիմությանը կոչ արեց միանալ այս աշխատանքին։
«Եկեք ձեւավորենք հանձնաժողովներ եւ միասին հնարավորինս շուտ ստեղծենք քաղաքացիական սահմանադրություն եւ ներկայացնենք մեր ժողովրդին։ Սա չանելու պատճառ չկա»,- ասել է Էրդողանը։Նա նշել է, որ իշխող կուսակցությունը կարող է արագ հանձնաժողովներ ստեղծել՝ աշխատելու նոր հիմնական օրենքի վրա։
