«Ժողովուրդ» օրաթերթը գրում է. ««Ժողովուրդ» օրաթերթի լավատեղյակ աղբյուրները փոխանցում են, որ ԱԺ ՔՊ խմբակցության պատգամավոր, մամուլում «շիշ բռնող» մականունով հայտնի Հայկ Սարգսյանի՝ ժամկետային զինծառայությունից փողով ազատվելու նախագիծը թեժ քննարկվել է նաև երեկ՝ ՔՊ վարչության նիստի ժամանակ:
«Ժողովուրդ» օրաթերթի աղբյուրները փոխանցում են, որ ՀՀ պաշտպանության նախարար Սուրեն Պապիկյանը ներկայացրել է նախագծում առկա խնդիրները, բացատրել, որ «կողմ» և «դեմ» տեսակետները խաչվում են իրար, բայց ռիսկային է նախագիծը:
Փաշինյանը պահանջել է կոնկրետ քննարկումներ ունենալ, հստակեցնել, որ նախընտրական այս փուլում նախագիծն իրենց ռեյտինգի վրա վատ ազդեցություն չունենա:
«Ժողովուրդ» օրաթերթի աղբյուրները նշում են, որ մայիսի 29-ին նախարար Պապիկյանն ԱԺ է գնալու՝ ՔՊ խմբակցության փակ նիստին մասնակցելու, որտեղ պետք է Հայկ Սարգսյանի մասնակցությամբ կայանա քննարկումը:
Հիշեցնենք, որ նախագծի համաձայն՝ քաղաքացիներին հնարավորություն կտրվի վճարել որոշակի գումար՝ ժամկետային զինծառայությունից ազատվելու կամ դրա փոխարեն այլընտրանքային ծառայության անցնելու համար։ Նախագծի մանրամասները պաշտոնապես դեռևս չեն հրապարակվել, սակայն, ըստ շրջանառվող տեղեկությունների, քննարկվում է վճարի չափը և դրա կիրառման պայմանները։
Բայց այս նախագիծը հակասում է ՀՀ Սահմանադրությանը, օրենքներին, քանի որ ՀՀ-ում զինծառայությունը պարտադիր է․ հիմա մականունավոր պատգամավորը բանակում ծառայելու «մենյու» է առաջարկում, ինչը տարբեր փորձագետներ հակահայկական ու հակաազգային են բնութագրել»։
