ՀՀ հակակոռուպցիոն դատարանը մեղմացրեց Գյումրու ավագանու ընտրություններում ընտրակաշառք տալու գործով մեղադրվող 2 կանանց խափանման միջոցի պայմանները: Այս մասին տեղեկանում ենք փաստաբան Արսեն Բաբայանի ֆեյսբուքյան էջից:
«Այսօր «Տատիկների» գործով դատարանը (Ս.Դադոյան) իմ միջնորդության առնչությամբ որոշեց, որ վարչական հսկողությունն առանց էլեկտրոնային սարքերի հնարավոր է: Դատարանը վերացրեց նաեւ 20:00-ից մինչեւ 08:00-ն տանը մնալու (կիսատնային կալանք) պայմանը»,-գրել է նա:
Որոշումը վերաբերում է «Մեր քաղաքը» ընդդիմադիր դաշինքի նախկին թեկնածու Անահիտ Խալաթյանին և քաղաքի բնակիչ Կիմա Հայրապետյանին:
Հիշեցնենք, որ Խալաթյանն ու Հայրապետյանը ձերբակալվել էին Գյումրու ավագանու ընտրությունների նախաշեմին։
Նույն գործով են անցնում քաղաքապետի նախկին թեկնածու, «Մեր քաղաքը» դաշինքի առաջնորդ պատգամավոր Մարտուն Գրիգորյանի ազգականները՝ հայր և որդի: Նրանց մեղադրում են ընտրողներին կաշառելու փորձի համար։