Ընդդիմադիրները պնդում են, որ այս նախագծով հսկիչներին իրավունք է տրվելու մարդկանց զննություն անցկացնել, այսինքն, հսկիչը կարողանալու է մարդկանց գրպանը մտնել, սո՛ւտ է սա, ժողովո՛ւրդ ջան: Այս մասին ԱԺ ամբիոնից տրանսպորտի սակագինը չվճարող քաղաքացիներին տուգանելու նախագծի քննարկման ժամանակ հայտարարեց ԱԺ փոխնախագահ Ռուբեն Ռուբինյանը:
«Նախագծով ասվում է՝ հսկիչն իրավունք ունի մարդուն նույնականացնի: Այսինքն, ի՞նչ է անում հսկիչը՝ գալիս ստուգում է՝ վճարե՞լ է, թե՝ չէ: Ենթադրենք չի վճարել, ասում է՝ անձնագիր տվեք, որ Ձեզ տուգանեմ, ասում է՝ անձնագիր չունեմ, ասում է՝ անձնագրի տվյալ կարո՞ղ եք տալ, ասում է՝ ոչ: Կարող է լուսանկարով նույնականացնել, եթե դա էլ չի ստացվում, մարդը հրաժարվում է նույնականացվել, այդ դեպքում հսկիչն իրավունք ունի դիմել ոստիկանին, որը, էսպես թե էնպես, ունի այդ իրավունքը մարդուն նույնականացնելու»,- ասաց նա:
Ռուբինյանը նշեց. «Այլ կերպ ասած՝ պնդումը, որ հսկիչին իրավունք է տրվում զննություն իրականացնելու, սուտ է»:
«Նախագծի վերաբերյալ եկել, քննարկում եք տրանսպորտի թանկացումը լա՞վ է, թե լավ չէ, մենք դա չենք քննարկում: Քննարկման նյութը հետևյալն է՝ եթե կա ինչ-որ գործող կանոն, այդ կանոնի խախտման համար պե՞տք է լինի տուգանք, թե՝ չէ, այդքան բան»,- ասաց նա: