Շարունակելով անվստահության թեման` ուզում եմ հիշեցնել, որ տարբեր առիթներով Ձեզ փոխանցել եմ մի շարք քրեական հանցագործությունների վերաբերյալ հաղորդումներ, սակայն այդ ընթացքում Ձեր գործողություններում որևէ տեսակի փութաջանություն չեմ նկատել։ Այս մասին ԱԺ արտահերթ նիստի ժամանակ, դիմելով դատախզին, ասաց «Պատիվ ունեմ» խմբակցության պատգամավոր Թագուհի Թովմասյանը:
«Հիշեցնում եմ ԱՆԻՖ-ի գործը՝ 25 միլիարդ դրամի չարաշահման մասին։ Գործը քննվում է դեռևս 2022 թվականից, սակայն մինչ այժմ որևէ նորություն չկա։ Նշեմ նաև Ֆուտբոլի ֆեդերացիայի գործը. այնտեղ շինարարություն է իրականացվել 783 միլիոն դրամով, մինչդեռ եղել է մրցույթային առաջարկ, որը շուրջ 50 միլիոնով ավելի էժան է եղել։ Բերում եմ նաև հայտնի կորոնավիրուսի ժամանակվա գործը՝ 120 միլիոն դրամի չարաշահման վերաբերյալ»,- ասաց նա:
Թովմասյանը նշեց, որ այդ գործով ներգրավված է կոնկրետ մի պատգամավոր, ով, խոսելով դատախազի գործունեության մասին, ասել է հետևյալը․ «Մենք կոռուպցիայի համաթվի խնդիր ունենք, պետք է ցույց տանք, թե որքան անկախ ենք»։
«Սակայն այդ գործի հիմքում որևէ ապացույց ես չեմ տեսել։ Սա ոչ թե իմ, այլ հենց «Քաղաքացիական պայմանագիր» խմբակցության պատգամավոր Արսեն Թորոսյանի հայտարարությունն է։ Նա ասել է, որ մարդկանց կանչում են հարցաքննության, ասում՝ «խոստովանի, թե չէ կձերբակալենք», իսկ եթե չեն խոստովանում, ասում են՝ «կկալանավորենք»։ Կրկին՝ սա ասել է Արսեն Թորոսյանը։ Այդպիսով՝ նաև «Քաղաքացիական պայմանագիր» խմբակցությունից կան մարդիկ, որոնք, ինչպես ես, չեն վստահում ձեր աշխատանքին»,- ասաց Թովմասյանը:
Ի պատասխան Վարդապետյանը նշեց, որ բոլոր այդ հարցադրումներին գրավոր պատասխաններ ուղարկվել են։ «Եվ դրական եմ համարում այն հանգամանքը, որ մինչև մեր կողմից գործը դատարան ուղարկելը տվյալները չեն արտահոսում։ Սա նշանակում է, որ ունենք մաքսիմալ քիչ արտահոսք, ինչը կարևոր ցուցանիշ է։ Երբ գործը փոխանցվի դատարան, Դուք կտեղեկացվեք։ Իսկ մինչ այդ մենք պատասխանում ենք միայն այն ծավալով, որը չի վնասում նախաքննությանը»,- ասաց գլխավոր դատախազը: