Վրաստանի Ֆինանսների նախարարության եկամուտների ծառայությունը հայտարարել է, որ երկրի տարածքում հայկական բեռների, այդ թվում՝ գազային ապրանքների «արգելափակման» մասին տեղեկատվությունը լիակատար սուտ է։ Այս մասին գրում է interpressnews.ge կայքը:
Հայտարարության մեջ ծառայությունը նշում է, որ «ապատեղեկատվությունը» ծառայում է հանրությանը մոլորեցնելուն, իշխանություններին վարկաբեկելուն, իսկ խնդիրը քաղաքական համատեքստ տեղափոխելու փորձ է։
«Ֆինանսների նախարարության եկամուտների ծառայությունը արձագանքում է որոշ լրատվամիջոցների և ընդդիմադիր կուսակցությունների ներկայացուցիչների կողմից Վրաստանում հայկական բեռների (ներառյալ գազային ապրանքների) ենթադրյալ «արգելափակման» վերաբերյալ տարածած հերթական ապատեղեկատվական հայտարարությանը և բացատրում, որ սա լիակատար սուտ է, ծառայում է հանրությանը մոլորեցնելուն, գերատեսչությանը վարկաբեկելուն և խնդիրը քաղաքական համատեքստ տեղափոխելու փորձին։
Ցանկանում ենք պարզաբանել, որ բեռնաշրջանառության աճի համատեքստում միջազգային փոխադրումներին մասնակցող տրանսպորտային միջոցների բոլոր մաքսային ընթացակարգերը կատարվում են հատուկ/ակտիվ ռեժիմով՝ դրանց անխոչընդոտ անցումն ապահովելու համար։
Բացի այդ, Վրաստանի տարածքում գործող բոլոր մաքսային կետերում մաքսային ծառայողները հերթապահում են օրական 24 ժամ՝ արագորեն իրականացնելու ինչպես անհատների, այնպես էլ ուղևորատար և թեթև տրանսպորտային միջոցների ստուգման ընթացակարգերը», — ասված է հայտարարությունում։
Ֆինանսների նախարարության եկամուտների ծառայությունը շեշտել է, որ լրատվամիջոցների կողմից տարածված լուսանկարչական և տեսաերիզային նյութերը (գազային արտադրանքով բեռնված տրանսպորտային միջոցների մասնակցությամբ) չեն արտացոլում մաքսային անցակետերում առկա իրական իրավիճակը, այդ թվում՝ Կազբեգիի մաքսային անցակետում, որտեղ բեռնատարների տեղաշարժի կարճատև ուշացում է եղել, որն ամբողջությամբ վերացվել է:
«Մենք կրկին կոչ ենք անում բոլորին զերծ մնալ չստուգված և սխալ տեղեկատվության տարածումից», — ասված է հայտարարությունում։
Ավելի վաղ ԱԺ «հայաստան» խմբակցության պատգամավոր Գառնիկ Դանիելյանը Facebook-ի իր էջում գրել էր, որ անհասկանալի իրավիճակ է ստեղծվել Ռուսաստանից հեղուկ գազ ներկրող բեռնատարների պարագայում։ Արդեն որերորդ օրն է՝ խոչընդոտվում է վրացական անցակետում տասնյակ գազատարների մուտքը Հայաստան։
Նա, մասնավորապես, նշել է. «Ստեղծված իրավիճակում հայկական կողմը պետք է անհապաղ քայլեր ձեռնարկեր՝ պարզելու, թե ինչով է պայմանավորված Վրաստանի մաքսային ծառայությունների նման պահվածքը։
Գազատարների վարորդներն ահազանգում են, որ ստեղծված պայմաններում գազի ճնշումը բարձրանում է՝ առաջացնելով արտահոսքի, պայթյունի վտանգ։ Պարբերական դարձած այսպիսի խոչընդոտները ահազանգ են հայ֊վրացական հարաբերությունների վատթարացման»:
