«Հրապարակ» թերթը գրում է. «ՔՊ-ում անտեղյակ են Եկեղեցու դեմ Փաշինյանի պլաններից՝ երբ և ինչպես են «Կտրիճ Ներսիսյանին հեռացնելու Վեհարանից»: Փաշինյանը գրառումից բացի այլ բան չի ասել, փակագծեր չի բացել: Միայն շատ «նեղ կռուգում» են տեղեկացված, այն էլ՝ ոչ ամբողջին: Նա վստահ է, որ այնպես է ստրկացրել իր կուսակիցներին ու պաշտոնյաներին, որ եթե դժոխք էլ առաջնորդի, իր հետևից կգնան, ուստի ի՞նչ կարիք կա ինչ-որ բան նախապես քննարկել, որ հակընդդեմ ճամբարում հակաքայլեր մտածեն: ՔՊ-ում ոմանք համոզված են, որ Փաշինյանը հոգեբանական գրոհի է դիմել իր վերջին գրառումով՝ հույսով, որ Վեհափառը տեղի կտա շանտաժին ու ինքնակամ կհեռանա:
Հոգևոր դասն ավելի քան վստահ է, որ կաթողիկոսն ինքնակամ չի հեռանալու։ Փաշինյանի գրառումից հետո քաղաքական ուժերն իրենց աջակցությունն են առաջարկել Վեհափառին, սակայն մեզ ասացին, որ նա հորդորել է չսրել իրավիճակը, նախապես ոչ մի բան չծրագրել, այլ պատրաստ լինել, բայց սպասել Փաշինյանի քայլերին։ Ոմանք կարծում են, որ նա դեռ հույս ունի «լեզու գտնել» Փաշինյանի հետ և անգամ դրա համար միջնորդներ է մեջ գցում»։