Սյունիքի մարզի Վանեք համայնքը դարձավ հայրենասիրության, մրցակցության ու միասնականության խորհրդանիշ․ այստեղ արդեն չորրորդ տարին անընդմեջ անցկացվեց «Դավիթբեկյան խաղեր» ռազմամարզական մրցույթ փառատոնը, որը համախմբում է Հայաստանի բոլոր մարզերի 14–17 տարեկան պատանիներին։ Այս տարի մասնակցեց 18 թիմ՝ ավելի քան 180 պատանի: Խաղերի պատմության մեջ առաջին անգամ խաղերին միացավ նաև Սփյուռքի ներկայացուցիչ։
«Կարևոր է միասնական լինելը։ Եթե ընտանիքի պես լինենք, բոլոր փորձությունները հաղթահարելի են»,- tribune.am-ին ասաց Մոսկվայից ժամանած թիմի մարզիչ Աշոտ Թևոսյանը:
Թեպետ նրա թիմը եզրափակիչ չհասավ, Աշոտ Թևոսյանը արդեն ծրագրում է 2026-ին հանդես գալ ոչ թե մեկ, այլ երեք թիմով: «Հաղթում է ոչ թե ամենաուժեղ, այլ ամենահամախմբված թիմը,- ասաց ծրագրի ղեկավար Ալինա Գևորգյանը: Նրա խոսքով՝ մրցույթների բարդությունն ամեն տարի ավելանում է:
«Թիմերի պատրաստվածությունը տարեցտարի բարձրանում է։ Այս տարի ունեցանք շատ ուժեղ մասնակիցներ։ Խաղերը կառուցված են այնպես, որ հաղթանակի համար կարևոր է ոչ միայն ուժն ու հմտությունը, այլև միմյանց աջակցելը։ Մրցույթը հաջողված է համարվում միայն այն դեպքում, երբ բոլոր թիմակիցները հասնում են ավարտին»,-ավալացրեց Ալինա Գևորգյանը:
Մասնակիցները մրցեցին 14 տարբեր փորձություններում՝ շախմատից մինչև անտառային պայմաններում ապրել, Խուստուփի գագաթի հաղթահարումից մինչև ադրբեջանագիտություն: «Դավիթբեկյան խաղերը»՝ ոչ միայն մրցույթ, այլև միասնականության դպրոց,- կարծում է«Ամրոց» հիմնադրամի հոգաբարձուների խորհրդի նախագահ Տիգրան Բունաթյանը:
«Հաղթաբակի հիմքում հզոր բանակն է, հզոր բանակ ունենալու համար պետք է ունենանք ուժողվ և մտքով զորեղ երիտասարդություն։ Գերնպատակը ոչ միայն առաջին տեղ գրավելն է, այլ միասնական հաղթանակն ու ամուր պետականություն կերտելը։ Երկիր-ամրոցի համար մեզ անհրաժեշտ է ազգ-բանակ»,-շարունակեց Բունաթյանը։
Մասնակիցները խոստովանում են՝ փորձությունները հեշտ չեն․ ջուր, ցեխ, խոչընդոտներ։ Բայց հաղթահարելուց հետո հաղթական զգացողությունն այնքան ուժեղ է, որ պատրաստ են նորից անցնել նույն ճանապարհը:
Այս համատեքստում գլխավոր մրցավար Արթուր Հայրապետյանը նկատեց․ «Թեպետ մասնակիցները դեռ պատանի են, բայց չեն հանձնվում ու չեն կոտրվում։ Նրանց մոտ հաղթահարելու պահը ուժեղ զգացողություն է ստեղծում, որը փոխանցվում է նաև մեզ»։
«Ամրոց» հիմնադրամի ներկայացուցիչները համոզված են՝ խաղերը պետք է դառնան ոչ միայն մարզային ու հանրապետական իրադարձություն, այլև շարունակաբար աճող շարժում, որը կձևավորի գիտակից քաղաքացի, զինվոր և առաջնորդ։
«Այս խաղերը ոչ միայն մրցույթ են, այլև փառատոն, մենք տոնում ենք ռազմամարզական մշակույթի տարածումը։ Երբեք եղածով չի կարելի բավարարվել, միշտ պետք է զարգանալ»,-ընդգծեց «Ամրոց» հիմնադրամի հոգաբարձուների խորհրդի անդամ Մանուկ Հերգնյանը:
Այս տարի խաղերը առաջին անգամ անցկացվեցին երկու փուլով։ Եզրափակիչում ուժերը չափեցին նախնական փուլերում հաղթող ճանաչված երեք թիմերը։ Վեց թիմից հաղթող դարձավ «ՈՄԱ Կապանը»։ Դավիթբեկյան խաղերն անցկացվում են Հայաստանի հարավային սահման Սյունիքում, քանի որ, ըստ Դավիթբեկյան խաղերի թիմի, Սյունիքը մեր հանրապետության առանցքային մասն է, ոորին պետք է ծանոթանան Հայաստանի բոլոր մարզերի ներկայացուցիչները, ճանաչեն ու պահեն իրենց հայրենիքի կարևոր հատվածը։
