«Հրապարակ» թերթը գրում է. «Ի տարբերություն Բագրատ սրբազանի, Միքայել արքեպիսկոպոս Աջապահյանի տեսակցությունն արգելված չէ, և պարբերաբար «Երևան-Կենտրոն»` ԱԱԾ-ին կից մեկուսարան նրան այցի են գնում փաստաբանները, մերձավորները, նաև՝ ընդդիմադիրները։ Սրբազանին այցելողները պատմում են, որ նրա «դուխը» տեղն է, հումորը՝ ևս: Ասում են՝ իմանալով, որ իրեն գաղտնալսում են, շարունակ հումորներ է անում Նիկոլ Փաշինյանի թեմայով` հատուկ գաղտնալսողների համար: Նաև աղոթք ու պատարագ է կարդում «կլյուչնիկների», ՔԿՀ աշխատողների համար։
Հիշեցնենք, որ սրբազանները նստած են նույն խցում։ Նրանց հարազատները «տուլիկ» տանելու հոգսը կիսել են իրար մեջ` 2 շաբաթ Միքայել Աջապահյանի, 2 շաբաթ` Բագրատ սրբազանի մերձավորներն են ուտելիք հասցնում: Երկու սրբազանն էլ, մեծ հաշվով, կալանավորված են իշխանության՝ Եկեղեցու դեմ արշավի շրջանակներում, թեպետ պաշտոնական մեղադրանքն իբրև թե «ահաբեկչության նախապատրաստման և իշխանությունը զավթելու կոչ անելու» «հանցանքներն» են»։
