«Շատ կարևոր է, որ այդ գործընթացները հնարավորինս հրապարակային են և հանրությունը մեծ հնարավորություն ունի արտահայտելու իր մոտեցումները»,- այս մասին «Համապարփակ անվտանգություն և դիմակայություն 2025» միջազգային համաժողովի ժամանակ ասաց ԱԽ քարտուղար Արմեն Գրիգորյանը` անդրադառնալով հարցին՝ Արցախի ցեղասպանությունից, Անկախության հռչակագրից մինչև Արարատի և Արագածի այդ խոսույթները, դրոշմանիշից սիմվոլների հեռացումը և այլ խոսույթները և դրանց շուրջ քննարկումները ինչպե՞ս են ազդում ներքին դիմակայության ներքին համախմբվածության վրա՝ անվտանգության ապահովման տեսանկյունից:
Նրա խոսքով՝ իրենք համոզված ենք, որ սա մի ճանապարհ է, որով անցնում ենք, որը անհրաժեշտ է մեր համապարփակ անվտանգությունը ապահովելու համար։
«Վարչապետի նշած օրինակը շատ լավ է. բնակարանը, երբ որ կառուցում ես, չպետք է պատերին ինչ-որ նկարներ ունենաս, որը կարող է հարևանի մոտ այլ էմոցիաներ առաջացնել:
Քանի որ մենք խաղաղության ճանապարհով ենք ընթանում, հարցեր կան, որոնց պետք է անրադառնանք, և շատ կարևոր է, որ այդ հարցերին ամբողջովին հրապարակային ենք անդրադառնում»,- նշեց ԱԽ քարտուղարը:
Նա ընդգծեց, որ չկա որևէ գաղտնի գործընթաց դրա մեջ և, ըստ նրա, ընդունում է և համակարծիք է իրենց հետ:
«Իհարկե, դեբատներ, քննարկումներ կան, բայց քանի որ ազատ հասարակություն ենք և հասարակությունն ունի արտահայտվելու բազմաթիվ միջոցներ և նաև գալիք ընտրություններն են լինելու դրա արտահայտման միջոցը։ Ես այստեղ ավելի շատ դիմակայության ավելի բարձր մակարդակ եմ տեսնում, որովհետև որևէ սահմանափակում չկա խնդիրների քննարկման կամ խնդիրների հասցեագրման»,- ասաց նա:
