Լեռնային Ղարաբաղից բռնի տեղահանված մեր հայրենակիցների սոցիալական աջակցության հարցերը 2023 թվականին ՀՀ Կառավարության դժվարին մարտահրավերներից էին: 2024 թվականի մայիսի 31-ի դրությամբ՝ ԼՂ-ից բռնի տեղահանված 17 հազար անձ աշխատանք է գտել: Այս մասին ԱԺ-ում բյուջեի կատարողականի քննարկման ժամանակ հայտարարեց ՀՀ փոխվարչապետ Տիգրան Խաչատրյանը։
«Հաշվառված անհատ ձեռնարկատերերի քանակը գերազանցում է հազարը»,- հավելեց նա։
Ըստ փոխվարչապետի՝ բռնի տեղահանվածների հետ կապված հումանիտար և սոցիալական խնդիրների կարգավորման նպատակով ծախսերի հանրագումարը կազմել է շուրջ 39 մլրդ դրամ, ընդ որում՝ սա ցուցաբերված աջակցության միայն այն մասն է, որը նշված սոցիալական խնդիրների լուծման համար ուղղվել է առանձին ծրագրերի միջոցով:
«Կարող ենք փաստել, որ ԼՂ-ից բռնի տեղահանված մեր հայրենակիցների սոցիալական խնդիրների լուծման հարցում ՀՀ Կառավարության արձագանքը եղել է արագ և համակարգված»,- ասաց փոխվարչապետը:
Տիգրան Խաչատրյանը հայտարերեց նաև, հավանական է, որ 2025 թվականի հունվարից 1-ից վարձակալության ծախսերի աջակցությունը դադարեցվի աշխատանքային տարիքի անձանց համար և օգնությունը հասցեագրվի առավելապես խոցելի խմբերին՝ երեխաներին, հաշմանդամություն ունեցող անձանց ու թոշակառուներին։
Նա ԼՂ-ից բռնի տեղահանված անձանց կոչ արեց ծանոթանալ աջակցության ծրագրերին, տալ հարցեր, որոնք կարող են օգնել իրենց որոշումները վերջնական կայացնելու համար ու իրացնել ծրագրով նախատեսված բնակարանի գնման կամ տան կառուցման իրավունքը։
