Իշխանական պատգամավոր Արմեն Խաչատրյանը թերևս տեղյակ չէ, թե իր տղան ինչով է զբաաղվում, կամ ինչ պաշտոն է զբաղեցնում: Համենայն դեպս, նա այդպես վստահեցրեց լրգրողների հետ զրույցում: «Իմ տղան 29 տարեկան տղա է, համալսարան ավարտած, իր ջանքերով հասել է որոշակի տեղ»,- այսպես արձագանքեց պատգամավորը ԱԺ-ում լրագրողների հետ զրույցում՝ անդրադառնալով մամուլում տեղ գտած հրապարակումներին։
Խաչատրյանն իր խոսքում նշեց, թե ՀՀ-ն ամեն օր իր զարգացումն է ապրում, պետական կառույցներն ամեն օր միջազգային ստանդարտներին են համապատասխանեցվում:
Հարցին՝ հիմա ավելի լավ է, որովհետև Ձեր եկամուտնե՞րն են ավելացել, նա պատասխանեց․ «Ոչ, այն ժամանակ իմ եկամուտներն ավելի շատ է եղել»։
Որդու աշխատավարձն ավելանալու վերաբերյալ դիտարկմանն էլ արձագանքեց․ «100 հազար դրամով ավելացել է․ իմ տղան 29 տարեկան տղա է, համալսարան ավարտած, ինքն իր ջանքերով հասել է որոշակի տեղ»։
Ճշտող հարցին՝ հոր գործոնը չկա՞, նա վստահեցրեց, թե չկա։ «Ոչ, չկա հոր գործոնը, իր պաշտոնը նորմալ չգիտեմ էլ ինչ է, գիտեմ որ իրավաբանական բաժնի պետ է, որովհետև ինքը իրավաբան է՝ Ֆրանսիական համալսարանը լավ սովորած, բանակ ծառայած և 29 տարեկան, 2 երեխա էլ ունի, դեռ պետք է աճի»,- ասաց նա։
Հիշեցնենք, որ այսօր մամուլը գրել էր՝ Խաչատրյանի որդին փորձագետից արագ «վերածվել» է «ՀՀ փորձագիտական կենտրոն» ՊՈԱԿ-ի կարևորագույն բաժիններից մեկի պետի, աշխատավարձն էլ նախորդ տարվա նկատմամբ ավելացել է 1.2 միլիոն դրամով։
