Պակիստանում դատարանը մինչև հուլիսի 22-ը ձերբակալել է նախկին վարչապետ Իմրան Խանին և նրա կնոջը՝ Բուշրա Բիբիին նոր մեղադրանքով՝ կապված «իշխանության ենթադրյալ չարաշահման հետ պետական «Թոշահանա» գանձարանից նվերներ ձեռք բերելու համար», տեղեկացրել է Geo հեռուստաալիքը։
Պակիստանի հակակոռուպցիոն գործակալությունը նոր մեղադրանք է առաջադրել այն բանից մոտ մեկ օր հետո, երբ Իսլամաբադի դատարանը շաբաթ օրը բավարարել էր Խանի և նրա կնոջ բողոքարկումը՝ չեղարկելով անօրինական ամուսնության մասին դատավճիռը։
«Դատարանը հանձնարարել է հակակոռուպցիոն ազգային բյուրոյին հարցաքննել երկու կասկածյալների Ադիալա բանտում, ինչպես նաև կարգադրել է ամուսիններին ներկայանալ դատարան հուլիսի 22-ին»,- տեղեկացրել է հեռուստաալիքը։
Նախկին վարչապետի և նրա կնոջ փաստաբանը հայտնել է, որ այս ձերբակալությունը հակաօրինական է՝ ավելացնելով, որ իրենց միջնորդությունը գրավի դիմաց ազատ արձակման մասին արդեն դիտարկվում է գերագույն դատարանում։
Պակիստանի կառավարությունը 2018-2022թ. գլխավորած Իմրան Խանը պաշտոնազրկվել է 2022թ. ապրիլի 10-ին նրան անվստահության քվե հայտնելու հետևանքով։ 2023թ. օգոստոսին Խանը ձերբակալվել է խարդախության գործով՝ կապված պետական «Թոշահանա» գանձարանում պահվող արժեքավոր իրերի վաճառքի հետ։ Ավելի ուշ նրան ներկայացվել են մի շարք մեղադրանքներ, մասնավորապես՝ պետական դավաճանության (գաղտնի հեռագրի տարածում) և այլն։ Խանի ներկայացրած բողոքարկումների ընթացքում մեղադրանքների մեծ մասը հանվել է, բայց նախկին վարչապետը մնացել է կալանքի տակ անօրինական ամուսնության գործով։
