Հա, ես վախենում եմ, որ ՀՀ-ն՝ որպես պետություն, զրոյացնելու ոմանց ծրագիրն իրականություն դառնա. ԱԺ-ում հայտարարեց Նիկոլ Փաշինյանը՝ ի պատասխան «Հայաստան» խմբակցության պատգամավոր Թադևոս Ավետիսյանի դիտարկման, որ 6 տարի առաջ խոսում էր դուխով կոչերով, դուխով գլխարկներով, իսկ հիմա վախենում է՝ թաքնվում ոստիկանների հետևում, վախենում է պատերազմի սպառնալիքներից։
«Վազգեն Սարգսյանն ասում էր ես վախենում եմ ոչնչից չվախեցողներից։ Հա, ես վախենում եմ, որ ՀՀ-ն պետությունը զրոյացնելու ոմանց ծրագիրն իրականություն դառնա, որովհետև այս դահլիճում ցանկապատից այս կողմ և այն կողմ կան մարդիկ, ովքեր գիտակցաբար այդ օրակարգն են տանում, կան մարդիկ, որ իրենց ձևակերպմամբ ազնիվ մղումներ ունեն»,-ասաց նա։
Ավետիսյանը նշեց, թե ինքն իրեն հարց տվե՞լ է, եթե ինքը չլիներ, ինչպիսին կլիներ Հայաստանը, Արցախը։
«Այո տվել եմ և պատասխանն էլ գիտեմ, հիմա կլիներ ամեն ինչ նույնը, մի տարբերությամբ՝ ՀՀ-ն կլիներ «գուբերնյա», 100 տոկոսով։ Այսօր ՀՀ քաղաքացին կարող է հանգիստ քնի, վստահ լինելով, որ վաղը արհավիրք տեղի չի ունենալու: Ես եմ ասել, որ մեր պետության գոյությանը վտանգ է սպառնում»,-ասաց նա։
Փաշինյանը ներկա վիճակի մեջ մեղավորների մատնացույց արեց։ «Մեղավորը նրանք են, ովքեր ձևավորել էին մի հատ փուչիկ դաշինք, որի անդամները պարզվեց, ոչ թե իրենց պայմանագրային պարտավորություններն են կատարում, այլ գնացել Ադրբեջանի հետ պլանավորում են մեր դեմ պատերազմ։ Այ դրանք են մեղավոր»,-ասաց նա՝ ընդգծելով, որ ՀԱՊԿ-ից էլ դուրս կգանք. «Դրանով էլ վախեցնո՞ւմ եք: Լավ ենք անում, մենք կորոշենք, երբ դուրս կգանք:Ասում ենք, այդնասելիքի պակաս չի եղել: Բա՞ կարողա հետ գնանք, ուրիշ ճանապարհ չկա»,- ասաց հեգնեց վարչապետը:
Դահլիճից հարցրեցին, իսկ թե ո՞ր ուղղությամբ է երկիրը գնում, պատասխանեց. «Գնում ենք և համարյա հասել ենք տեղ, գնում ենք իրական Հայաստան, ինքնիշխան, անվտանգ, խաղաղ, սահմանազտված սահմաններով, ուղղակի շուտ չենք ասում, որ ձեր տրամադրությունը հանկարծ չընկնի»։
