Լեռնային Ղարաբաղից բռնի տեղահանված ընտանիքների համար բնակելի տների կառուցման 18 նախագիծ է հաստատվել, որոնք հրապարակվել են Քաղաքաշինության կոմիտեի կայքում:
Առանձնացվել են 40 քմ, 60 քմ, 75 քմ, 90 քմ և 120 քմ մակերեսներով բնակելի տների նախագծեր, որոնք ներկայացրել են 5 կազմակերպություններ։ Հետագայում նոր առաջարկները ևս կներառվեն այս բաժնում։
Հրապարակված 18 նախագծերից ութն ավանդական կոնստրուկցիաներով են` քարե կրող պատերով և երկաթբետոնե հիմնակմախքով, իսկ տասը արագ կառուցվող տների նախագծեր են, որոնք ներառում են 1 քառակուսի մետրի կողմնորոշիչ արժեքը, նախահաշիվ, ծավալաթերթ, բացատրագիր։
Նախընտրած տարբերակն ընտրելուց հետո տների կառուցման համար անհրաժեշտ է դիմել շինարարություն իրականացնող լիցենզավորված կազմակերպություններին, որոնց ցանկը հրապարակված է կոմիտեի կայքում կամ` նախագիծը հեղինակած ընկերությանը։
