ՀՀ երկրորդ նախագահ Ռոբերտ Քոչարյանը Ամանորի և Սուրբ Ծննդյան տոների առթիվ հանդես է եկել շնորհավորական ուղերձով՝ անդրադառնալով անցնող տարվա մարտահրավերներին և գալիք 2026 թվականի ակնկալիքներին։ Իր խոսքում Քոչարյանը շեշտել է ազգային միասնականության, համառ աշխատանքի և համատեղ ջանքերի անհրաժեշտությունը՝ երկրի համար ստեղծված բարդ իրավիճակը հաղթահարելու և պետականությունը վերականգնելու նպատակով։
«Սիրելի հայրենակիցներ, Ավարտին է մոտենում 2025 թվականը․ մեր պետականության համար հերթական ծանր տարին, որը գոյատևեցինք շարունակական աշխարհաքաղաքական նվաստացման, ազգային արժեքների ոտնահարման պայմաններում։
Այսօր՝ Ամանորի շեմին, ուզում եմ վստահություն հայտնել, որ գալիք 2026-ին համատեղ աշխատանքով, միահամուռ ուժերով հնարավոր կլինի ի վերջո պարտությունների, ձախողումների ու շարունակական նվաստացումների այս անիվը կանգնեցնել։ Պետք է անել յուրաքանչյուրիցս պահանջվող առավելագույնը, գործի դնել մեր ազգային լավագույն որակները, որպեսզի հաջորդ Ամանորը դիմավորենք իրական խաղաղության, ազգային միասնականության ու համերաշխության մթնոլորտում:
Հավատում եմ, որ միասնական համառ աշխատանքով ունակ ենք ուղղել մեր մեջքը, վերագտնել մեր ազգային նկարագիրը, ոտքի կանգնեցնել մեր պետությունը՝ մեր արժանի տեղը կրկին զբաղեցնելով աշխարհում։ Շնորհավոր Ամանոր և Սուրբ Ծնունդ»,- ասվում է ուղերձում։
2026-ին համատեղ ուժերով հնարավոր կլինի կանգնեցնել պարտությունների ու նվաստացումների անիվը․ Ռոբերտ Քոչարյան
