ԱՄՆ նախագահ Դոնալդ Թրամփը չի բացառել Վաշինգտոնի կողմից Իրանի դեմ հնարավոր գործողությունները, այդ թվում՝ ավիահարվածները։ Այս մասին Fox News-ի եթերում հայտարարել է Սպիտակ տան մամուլի քարտուղար Քերոլայն Լևիթը։
Նրա խոսքով՝ Թրամփը ավանդաբար «բոլոր տարբերակները պահում է սեղանին», իսկ ավիահարվածները կարող են լինել ԱՄՆ գերագույն գլխավոր հրամանատարի կողմից դիտարկվող բազմաթիվ սցենարներից մեկը։ «Ավիահարվածները կլինեն ընդամենը հնարավոր տարբերակներից մեկը։ Դիվանագիտությունը միշտ նախագահի առաջնային ընտրությունն է», — նշել է Լևիթը։
Միաժամանակ Իրանում բողոքի ցույցերը շարունակվում են դեկտեմբերի 28-ից։ Անկարգությունները սկզբում սկսվել են Թեհրանի գլխավոր շուկայում, որտեղ խանութպաններն ու մի շարք համալսարանների ուսանողներ բողոքի ակցիաներ են իրականացրել՝ դժգոհելով կառավարության քաղաքականությունից՝ ազգային արժույթի կտրուկ արժեզրկման և գների աճի ֆոնին։ Հետագայում բողոքի ցույցերը տարածվել են երկրի տարբեր շրջաններում։
