«Հինգ իրավապաշտպանների նախաձեռնությունը» հայտարարություն է տարածել մեդիագործիչ Նարեկ Սամսոնյանի նկատմամբ իրականացվող քրեական հետապնդման, նրա հացադուլի և առողջական վիճակի վերաբերյալ։
Հայտարարության մեջ նշվում է, որ նախաձեռնության անդամներին գործընկեր Ռուբեն Մելիքյանը ներկայացրել է Նարեկ Սամսոնյանի գործին վերաբերող անհրաժեշտ մանրամասները։ Ներկայացված փաստերի ուսումնասիրության արդյունքում նախաձեռնությունը հայտարարել է, որ Եվրոպայի խորհրդի Խորհրդարանական վեհաժողովի թիվ 1900 բանաձևի իմաստով Նարեկ Սամսոնյանը հանդիսանում է քաղբանտարկյալ, քանի որ նրա նկատմամբ քրեական հետապնդում է իրականացվում ակնհայտորեն հանցանք չհանդիսացող արարքի համար։
Ըստ հայտարարության՝ վերոգրյալից բխում է, որ Նարեկ Սամսոնյանի հացադուլի պահանջը իրավաչափ և տրամաբանական է։
Իրավապաշտպանները պահանջում են իրավասու պետական կառույցներից՝
1) Անհապաղ ազատ արձակել քաղբանտարկյալ Նարեկ Սամսոնյանին։
2) Հրատապ ձևով ապահովել քաղբանտարկյալ Նարեկ Սամսոնյանի ուղեգրումն իր ընտրած բուժհաստատություն՝ շտապ վիրահատության։
3) Հացադուլի ընթացքում քաղբանտարկյալ Նարեկ Սամսոնյանի համար ապահովել հացադուլն իրականացնելու այնպիսի պայմաններ, որոնք ավելի վատը չեն, քան մինչև հացադուլը եղած պայմանները։
Միաժամանակ նախաձեռնությունը կոչ է անում իրավապաշտպան կառույցներին խնդիրը պահել ուշադրության կենտրոնում։
